Nga “i ngrirë” në hero: Albin Krasniqi i sjell Prishtinës trofeun e Kupës para 10 mijë shikuesve

Prishtina ka fituar Kupën e Kosovës për edicionin 2024/25, duke mposhtur Llapin me rezultat minimal 1-0 në një ndeshje të bukur të zhvilluar para rreth 10 mijë shikuesve në stadiumin “Fadil Vokrri”.

Goli vendimtar u shënua në fillimin e pjesës së parë nga Albin Krasniqi, i cili përveç se ishte protagonist i finales, është edhe historia më interesante e këtij suksesi.

Mesfushori, që vetëm disa muaj më parë ishte “ngrirë” nga klubi për shkak të mosmarrëveshjeve kontraktuale, u rikthye fuqishëm në momentin kur skuadra kishte më së shumti nevojë për të.

Krasniqi, së bashku me kapitenin Drilon Islami, ishin jashtë planeve të trajnerit Jean Michel-Cavalli për një periudhë, pasi nuk gjetën gjuhë të përbashkët me klubin për rinovim.

Por, situata ndryshoi kur Prishtina pa se sezoni mund të rrëshqiste në një fiasko sportive. Klubi vendosi të bëjë një hap pas, duke rikthyer Krasniqin në qendër të kreativitetit të ekipit.

Vendimi doli të ishte i drejtë. Mesfushori realizoi edhe në gjysmëfinale kundër Dritës, në një fitore bindëse 3-0, për ta vazhduar formën e tij edhe në finalen e madhe ndaj Llapit. Me këtë paraqitje, ai konfirmoi edhe një herë se është një nga mesfushorët më të mirë në futbollin kosovar.

Nga një situatë e pasigurt, në një kontribut vendimtar për trofe, Krasniqi kaloi nga “i padëshiruar” në hero të qytetit, duke dëshmuar rëndësinë e karakterit, profesionalizmit dhe momentit në sport.

Për Prishtinën, ky është një tjetër sukses i madh që e mban klubin në majat e futbollit të Kosovës, ndërsa për Krasniqin, ndoshta kjo finale do të mbetet si pika më kulmore në karrierën e tij – të paktën deri në kontratën e ardhshme. /Telegrafi/