Nga ndenja e triumfit te gjesti i dhënies të trofeut për bashkëlojtarët – Berat Gjimshiti tregon të gjitha

Berat Gjimshiti ka folur për triumfin e Atalantës në Ligën e Evropës, ndjenjën e fituesit, gjestin e dorëzimit të trofeut te bashkëlojtarët dhe gjithçka tjetër.

Atalanta arriti të thyej Bayer Leverkusenin pas 51 ndeshjesh pa humbje, duke mposhtur me rezultat të pastër 3-0 në finalen e Ligës së Evropës.

Trofeu i dytë në histori për Atalantën pas Kupës së Italisë më 1963 erdhi pas një paraqitje mbresëlënëse nga të gjithë lojtarët, por në veçanti Ademola Lookman, i cili shënoi het-trik.

“Është e vështirë të gjesh fjalët në këtë moment, vështirë se mund ta kuptoj se çfarë bëmë”, ka thënë fillimisht Gjimshiti për Sky Sport Italia.

“Ky është një sukses shumë i madh, veçanërisht pasi humbëm finalen e Kupës së Italisë një javë më parë dhe disponimi ynë nuk ishte i mirë, pasi nuk luajtëm mirë. Megjithatë, për momentin nuk më intereson që i humbëm ato tre finalet e tjera, sepse fituam këtë!”.

𝐂 𝐀 𝐌 𝐏 𝐈 𝐎 𝐍 𝐈 🏆🇮🇹 pic.twitter.com/MWRGiPu4Pd

— 433 (@433) May 22, 2024

Edhe pse ai ishte kapiten në mbrëmjen e së mërkurës, Gjimshiti ia dorëzoi trofeun për ta ngritur dy bashkëlojtarëve të tij, Marten de Roon dhe Rafael Toloi.

“Kam qenë këtu për tetë vjet dhe kam qenë kapiten sonte, por Toloi dhe De Roon janë përpara meje. Isha krenar të dija se do të mbaja shiritin sot, por të gjithë japin gjithçka”.

“Ne luajtëm shumë mirë sonte dhe e merituam plotësisht, nuk kishte asnjë dyshim këtë mbrëmje. Ndoshta motoja e tifozëve ‘përtej rezultatit’ ishte sepse nuk fituam kurrë! Por, ata na mbështetën vazhdimisht, edhe në finalet e humbura, dhe të gjithë e meritojnë këtë sukses”.

Ka qenë një proces i jashtëzakonshëm për Atalantën, e cila është transformuar totalisht nga trajneri Gian Piero Gasperini që nga ardhja e tij në 2016.

“Kur erdha për herë të parë, Atalanta po luante për të shmangur rënien. Duke sjellë Gasperinin dhe këtë filozofi të re, ai gjithmonë dëshiron të përmirësojë lojtarët dhe të marrë më të mirën nga të gjithë, me kalimin e viteve fillova të imagjinoja se mund të fitonim një trofe. Ndoshta jo Ligën e Evropës, kisha shpresuar për Kupën e Italisë, pasi u afruam tre herë”, përfundoi mbrojtësi shqiptar. /Telegrafi/