Mbappe do ta zgjidh në gjykatë çështjen e shumëpërfolur me PSG-në, kërcënon nëna e sulmuesit

Nëna dhe përfaqësuesja e Kylian Mbappe, Faiza Lamari, ka kërcënuar se do të ndërmarrë veprime ligjore kundër Paris Saint-Germain nëse klubi dështon të paguajë paratë e papaguara të djalit të saj prej 100 milionë euro.

Mbappe u prezantua gjatë të martës si lojtar i ri i Real Madridit, pasi u largua këtë verë pas përfundimit të kontratës me PSG.

Megjithatë, lojtari dhe klubi francez kanë ende punë të pazgjidhura, të cilat sipas nënës së lojtarit do të zgjidhen në gjykatë.

Lexo po ashtu Kontrata e Mbappes me Real Madridin do të jetë më e madhe se 250 milionë euro

“Nëse nuk kemi zgjidhje tjetër, atëherë sigurisht që do të ketë gjykim. Shpresoj që të respektohet kontrata e nënshkruar dy vite më parë”, ka thënë fillimisht Lamari.

“Le të ndalojmë së spekuluari për atë që tha apo nuk tha Kylian. Në fakt, askush, duke përfshirë mua dhe përfaqësuesit e PSG-së, nuk mund të thotë saktësisht se çfarë ndodhi, pasi të gjitha takimet e Kylian me presidentin u zhvilluan në mënyrë private, përveç një herë”, përfundoi nëna e lojtarit.

Sipas gazetës franceze L’Equipe, PSG nuk ka paguar pagën dhe shpërblimet e Mbappes që nga prilli 2024. Situata mund të përshkallëzohet në një betejë ligjore nëse një zgjidhje nuk arrihet së shpejti. /Telegrafi/