Ambasadori i Kosovës në Kroaci, Martin Berishaj, ka pranuar se ka bashkëpunuar me kompaninë energjetike “GEN”, e cila u përmend në skandalin financiar të zbuluar në prill të këtij viti nga mediumi slloven “Planet TV”.

Reklama

Berishaj tha se ka punuar si këshilltar në këtë kompani, por që nga viti 2019 nuk ka pasur asnjë komunikim apo bashkëpunim me ta.

Këto deklarata ai i bëri të enjten gjatë raportimit në Komisionin Parlamentar Hetimor në lidhje me menaxhimin e krizës energjetike.

“Unë GEN-in natyrisht e njoh shumë mirë. Është një firmë 100 për qind me pronë në Slloveni. Unë kam qenë aty si këshilltar. Kam dhënë këshilla politike se çfarë do të duhej të bëjë një firmë madhe. GEN-i është e regjistruar si ZRRE në Kosovë. Ka licencë nga viti 2019 dhe bën shit-blerje. Nga viti 2019 nuk kam komunikim dhe bashkëpunim me ta”, ka thënë Berishaj.

Reklama
Reklama

Ai tutje ka deklaruar se kompania GEN vepron në 25 shtete të botës.

“Është një ndër kompanitë më prestigjioze në Evropë”, ka shtuar ai, duke mohuar t’i ketë pranuar 600 mijë euro nga kjo kompani, siç kanë raportuar mediat sllovene. /Telegrafi/