Manchester United ofron dy yjet e saj tek klubet e Ligës Saudite

Manchester United i ka ofruar shërbimet e Jadon Sanchos dhe Antony klubeve të Ligës Saudite, teksa po synojnë të rikuperojnë paratë që i shpenzuan për transferimin e tyre.

United shpenzoi në total 155 milionë euro për të transferuar dy sulmuesit, por asnjëri prej këtyre dy transferimeve nuk ka arritur të dëshmojë veten.

Sancho u përjashtua nga ekipi i “Djajve të Kuq” pas një përplasje verbale me trajnerin Erik Ten Hag, pasi tekniku holandez e kritikoi atë për mungesë të angazhimit në stërvitje, dhe kësisoji u huazua tek Dortmundi.

Antony ndërkohë, ka dështuar që të shënojë ose të asistojë në 22 ndeshje këtë sezon dhe nuk ka qenë një startues i rregullt për ekipin.

Evening Standard ka raportuar se Manchester United ka kontaktuar me klubet arabe, duke shpresuar se ndonjëra prej tyre do të tregojë interesim për lojtarët e tyre.

Lexo po ashtu Manchester United po përgatitet për transferimin sensacional të Ivan Toneyt

Klubet e Lindjes së Mesme janë duke shpenzuar shuma enorme për të rekrutuar yje nga top pesë ligat evropiane, por që është thënë se në afatin e janarit janë duke kërkuar që të transferojnë lojtarë për shuma të vogla parash.

Sido që të jetë, në rast se një largim i tyre nuk bëhet i mundshëm gjatë këtij muaji, drejtuesit e klubit anglez do të shpresojnë se gjatë verës do t’i marrin të paktën nga 50 milionë euro për secilin prej tyre./Telegrafi/