Lëshohet njoftimi i parë nga Superliga Evropiane – mësohen planet e tyre për formatin që pritet ta ‘pushtojë’ futbollin

Planet për Superligën Evropiane më në fund janë zbuluar.

Një deklaratë erdhi vonë të dielën mbrëma duke konfirmuar se 12 klube evropiane duan të krijojnë një garë të re në mes të javës.

Manchester United , Man City, Chelsea , Arsenal , Tottenham , Liverpool , Juventus , AC Milan, Inter Milan, Real Madrid , Barcelona dhe Atletico Madrid janë bashkuar të gjithë si klube themeluese.

Këto 12 klube kanë dalë zyrtarisht nga Shoqata Evropiane e Klubeve.

Tre klube të tjera pritet të bashkohen, megjithëse këto nuk janë ende të ditura, me garën që planifikohet të zhvillohet sa më shpejt të jetë e mundur.

Klubet themeluese do të marrin një pjesë prej 3 miliardë funte për të mbështetur planet e tyre të investimeve dhe “për të kompensuar ndikimin” e pandemisë.

Ata thonë se tani janë duke pritur të zhvillojnë diskutime me UEFA dhe FIFA për të punuar mbi propozimin.

Pas njoftimit, UEFA tha: “Klubet në fjalë do të ndalohen të luajnë në çdo garë tjetër, në nivel Evropian ose Ndërkombëtar, dhe lojtarëve mund t’u mohohet mundësia të përfaqësojnë ekipet e tyre kombëtare”.

FIFA shtoi: “[Ne] mund të shprehim vetëm mosmiratimin për një ‘ligë të mbyllur evropiane të shkëputur’ jashtë strukturave ndërkombëtare të futbollit.”

Deklarata e Superligës e së dielës zbuloi formatin e garës.

Formati i Garës

20 klube pjesëmarrëse, 15 Klube Themeluese dhe një mekanizëm kualifikues për pesë ekipe të tjera për t’u kualifikuar çdo vit bazuar në arritjet në sezonin e kaluar.

Ndeshjet e mesjavës me të gjitha klubet pjesëmarrëse që vazhdojnë të garojnë në ligat e tyre përkatëse kombëtare, duke ruajtur kalendarin tradicional të ndeshjeve të brendshme.

Një fillim gushti me klube që marrin pjesë në dy grupe me nga dhjetë skuadra, duke luajtur ndeshje në shtëpi dhe jashtë, me tre më të mirat në secilin grup automatikisht kualifikohen për çerekfinale. Ekipet që përfundojnë të katërtin dhe të pestën do të garojnë më pas në një play-off. Një format eliminimi me dy ndeshje do të përdoret për të arritur në finale në fund të majit, i cili do të vihet në skenë si një ndeshje e vetme në një vend neutral.

Klubet themeluese thonë se turneu i ri vjetor do të sigurojë “rritje ekonomike dhe mbështetje dukshëm më të madhe për futbollin evropian përmes një angazhimi afatgjatë për pagesa të pa solidarizuara që do të rriten në përputhje me të ardhurat e ligës“, bëhet e ditur më tej nga pikat kyçe. /Telegrafi/