Lekaj flet për dorëheqjen e Haradinajt, tregon se çfarë do të ndodhë me projektet e infrastrukturës

Ministri në dorëheqje i Ministrisë së Infrastrukturës, Pal Lekaj, në emisionin “Zyra e Ankesave”, në RTV Dukagjini ka folur për qeverinë në dorëheqje dhe projektet e infrastrukturës që janë duke vazhduar në vend.

Lekaj ka thënë se akti i Ramush Haradinajt tregon edhe njëherë që është burrështetas.

Ai po ashtu tha se si parti janë gati për zgjedhje, të cilat zgjedhje sipas tij do të jenë referendum për Kosovën, transmeton Telegrafi.

“Akti i Haradinajt ka treguar edhe njëherë që është burrështetas. Po gjithsesi jemi gati për zgjedhje. Këto zgjedhje do të jenë referendum për Kosovën. Kemi shtet demokratik dhe nuk e lidhim fatin tonë për karrige”, ka thënë Lekaj.

Ministri në dorëheqje gjithashtu theksoi se çdo projekt i nisur nga ministria që ai e drejton do të përfundojë.

“Projektet që kanë nisur në Veternik nuk do të ndalen dhe janë duke u punuar me intensitet të madh. Edhe pse jemi qeveri në dorëheqje, ne duhet të punojmë edhe më shumë. Pothuajse gati po mbyllet mozaiku i infrastrukturës dhe më vjen mirë që për këto dy vite është prekur çdo rrugë e Kosovës”, ka thënë Lekaj. /Telegrafi/