Kush është Robert Fico, kryeministri i plagosur sllovak?

I lindur në një familje të klasës punëtore më 15 shtator 1964, Fico – me profesion avokat – e filloi karrierën politike në partinë komuniste pak përpara Revolucionit të Kadifenjtë të vitit 1989 që solli shpërbërjen e ish-Çekosllovakisë.

Ai ishte përfaqësues i shtetit sllovak në Gjykatën Evropiane të të Drejtave të Njeriut nga viti 1994 deri në vitin 2000.

Ai e krijoi partinë e qendrës së majtë Smer-SD në vitin 1999 pasi u refuzua për një post ministror nga e majta Demokratike, trashëgimtarët politikë të komunistëve.

Politikani 59-vjeçar është krahasuar më parë me ish-presidentin amerikan, Donald Trump.

Por, fitorja e vitit të kaluar nënkuptonte se NATO kishte gjithashtu liderin e parë që ishte dashamirës ndaj Vladimir Putinit të Rusisë.

Kritikët kanë shprehur frikën se kryeministri i ri do të braktiste kursin pro-perëndimor të Sllovakisë.

Kjo do të thotë se do të ndiqte rrugën e kryeministrit hungarez, Viktor Orban, raporton skynews.

Mijëra njerëz kanë mbajtur vazhdimisht protesta në të gjithë vendin kundër politikave të Ficos, transmeton Telegrafi.

Fico dhe partia që drejton SMER, ose Drejtimi, siguruan gati 23 për qind të votave në qendrat e votimit në muajin tetor.

Ai është i njohur për sulmet e ashpra kundër gazetarëve dhe ka bërë fushatë kundër imigracionit dhe të drejtave të LGBTQ+.

Kryeministri ka kundërshtuar më parë sanksionet e Bashkimit Evropian ndaj Rusisë – dhe ka qenë kundër anëtarësimit të Ukrainës në NATO.

Ai beson se SHBA-ja dhe vendet e tjera duhet të përdorin ndikimin e tyre për të detyruar Rusinë dhe Ukrainën të arrijnë një marrëveshje paqeje përmes kompromisit.

Politikani themeloi partinë SMER në vitin 1999 dhe ka shërbyer si kryeministër i vendit për më shumë se dhjetë vjet në tre periudha të ndryshme.

Me një fushatë të bazuar në përmbysjen e reformave shtrënguese, Fico filloi periudhën e parë katërvjeçare si lider i vendit në vitin 2006.

Ai u kthye si lider në zgjedhjet parlamentare të vitit 2012, por dështoi në një përpjekje për të fituar zgjedhjet presidenciale të vitit 2014.

Në vitin 2016, pavarësisht se fitoi zgjedhjet parlamentare, partia e Ficos nuk ishte në gjendje të siguronte një shumicë dhe pasi një koalicion shumëpartiak e lejoi atë të qëndronte si lider, ai dha dorëheqje në vitin 2018. /Telegrafi/