“Kosovarët më kanë penalizuar”, Vesa Smolica thotë se është zhgënjyer me Alma Bektashin dhe Florent Boshnjakun për vlerësimin në Festivalin e RTSh-së

Këngëtarja e njohur Vesa Smolica ka qenë e ftuara e radhës në “Shok Podcast” me Fisnik Junikun, ku ka folur për rrugëtimin e saj muzikor dhe përvojën në talent show-t shqiptare.

Gjatë bisedës, moderatori e pyeti nëse ndonjëherë i ishte sugjeruar të deklaronte më shpesh se është nga Kosova. Në përgjigjen e saj, Vesa theksoi se nuk e kishte ndjerë një nevojë të tillë dhe se gjithmonë është vlerësuar nga juritë, pavarësisht origjinës.

“Në atë festival (Festivalin e RTSh-së) kanë qenë dy kosovarë në juri, nëse do të donin, do të më kishin ngritur më lart. Alma Bektashi, e cila ka qenë edhe mentorja ime në ‘The Voice’, më dha vendin e katërt. Po të më kishte dhënë të dytin, unë do të isha renditur e para. Ndërsa Florent Boshnjaku më dha vendin e tretë”, tha këngëtarja nga Gjakova.

Ajo shtoi se, ndonëse nuk është renditur ndonjëherë e para në garat ku ka marrë pjesë, në Shqipëri i janë hapur dyert dhe është bërë një emër i njohur në skenën muzikore. “Ata më kanë dhënë mundësi, më kanë brenduar si Vesa Smolica, edhe pse asnjëherë nuk më kanë dhënë vendin e parë. Megjithatë, gjithmonë kam prekur finalet dhe kam qenë në top tre apo top dy”, tha ajo.

@shokpodcast Vesa : Kosovaret me kan penalizu 😳 #fyp #foryou #viralvideos #fisjuniku #trendin #podcasts #shokpodcast #talkshow #kosova #prishtina #foru #realtalk #viral_video #perty #pert #viralvideotiktok #rtsh #eurovision #florentboshnjaku #vesasmolica #almabektashi #musica ♬ original sound – ShokPodcast

Këngëtarja e hitit “A po gëzohesh” la të kuptohet se në garat muzikore, vlerësimi është gjithmonë subjektiv dhe se shijet ndryshojnë. Ajo shtoi se e vlerëson përvojën e saj dhe është mirënjohëse për mundësitë që i janë dhënë, pavarësisht klasifikimeve.

Ky rrëfim i Vesës në “Shok Podcast” ka ngjallur interes të madh te publiku, veçanërisht mes ndjekësve të muzikës në Kosovë dhe Shqipëri, duke rikthyer diskutimin mbi mënyrën se si vlerësohen artistët në skenën shqiptare. /Telegrafi/