Kërcënimet ndaj zyrtarëve të LDK-së, Zemaj: Këtë çështje ua lëmë në dorë organeve të rendit

Deputeti i Lidhjes Demokratike të Kosovës (LDK), Armend Zemaj është njëri prej zyrtarëve të kësaj partie për të cilët është raportuar mbrëmë se janë kërcënuar.  

Zemaj në një prononcim për Telegrafin ka thënë se këtë çështje do t’ia lënë organeve të rendit dhe drejtësisë.

“I sqarojnë organet e rendit sigurisht. Le t’ia lëmë drejtësisë”, ka thënë shkurt Zemaj.

Lexo po ashtu Kërcënimet ndaj zyrtarëve të LDK-së, Islami: Kanë ardhur nga shërbimet inteligjente të Serbisë ose të vendeve jo mike të Kosovës

Ndërkaq, nënkryetari i Lidhjes Demokratike të Kosovës, Kujtim Shala, të mërkurën kishte thënë se ka pasur një plan të strukturuar për atentat ndaj disa zyrtarëve të LDK-së.

Bëhet fjalë për Lumir Abdixhiku, Abdullah Hoti, Armend Zemaj dhe Arben Gashi, të cilët ishin pjesë e këtij planifikimi për atentat.

E për këtë njohësi i sigurisë, Avni Islami në një prononcim për Telegrafin ka thënë se përderisa nuk ka ndonjë adresë të saktë se kush e ka bërë këtë kërcënim, opinioni publik nuk duhet të ngutet, derisa të dihet se nga kanë ardhur.

Sipas tij, gjithmonë kur ka kriza politike një palë e tretë, siç është Serbia mundohet të shfrytëzojë rastin për të bërë vëlla vrasje në vend.

Ndryshe, pas raportimeve për këtë kërcënim detaje kanë dhënë edhe Policia e Kosovës, ku zëdhënësi i Policisë për Rajonin e Prishtinës, Bajram Krasniqi, ka bërë të ditur se janë duke hetuar këtë rast, duke e cilësuar si “kanosje”.

Siç u raportua në media kërcënimi është denoncuar nga organet gjermane të sigurisë. Po ashtu këto organe kanë rënë në gjurmë të një përgjimi ku flitet për një atentat direkt ndaj kryetarit të LDK-së dhe deputetëve të kësaj partie. /Telegrafi/