Këngët dhe jeta personale e Taylor Swift do të jenë tema e një kursi psikologjie në Universitetin Shtetëror të Arizona

Studentët në Universitetin Shtetëror të Arizonës mund të studiojnë muzikën dhe jetën e Taylor Swift për kreditimin e kolegjit.

Psikologjia e Taylor Swift po debuton këtë semestër në kampusin Tempe, Arizona.

Kursi jepet nga studenjta e Ph.D. Alexandra Wormley, e cila shpreson të frymëzojë biseda kuptimplota që i çojnë studentët drejt koncepteve të avancuara të psikologjisë, shkruan DailyMail.

“Kursi në thelb përdor Taylor Swift si një shembull të gjatë semestral të fenomeneve të ndryshme – thashetheme, marrëdhënie, hakmarrje”, tha Wormley.

Ajo shtoi se “klasa nuk është një seminar se sa na pëlqen apo nuk e pëlqejmë atë – ne duam të jemi në gjendje të mësojmë rreth psikologjisë”.

Kursi filloi si një shaka, por shpejt u shndërrua në një mënyrë gjeniale për të studiuar fenomenet e psikologjisë sociale, raportoi ASU News.

Jo shumë kohë pas koncerteve të këngëtares së hitit “Lavender Haze” në Glendale, Arizona në mars, ndihmësit e saj hulumtues bënë shaka se do të donin të merrnin një kurs për Swift.

“Më pëlqeu ideja dhe me shaka bëra një skicë të përafërt të asaj se si mund të dukej sigurisht. E paraqita në departamentin tim dhe me sa duket atyre u pëlqeu”, shpjegoi Wormley.

Dhe kursi do të organizohet njësoj si turneu i Swift “Eras Tour” – çdo javë do të fokusohet në një temë nga një prej albumeve të këngëtares.

Wormley do ta lidhë temën me një temë në psikologjinë sociale.

“Ne do të bëjmë zhytje të thellë në tema shumë specifike, në mënyrë që studentët të kenë një ekspertizë në secilën prej këtyre fushave deri në fund të çdo jave”, tha tutje Wormley.

“Më duket shumë më tërheqëse kjo metodë e të mësuarit sesa kurset e anketave që duhet të mbulojnë çdo temë brenda një semestri”, shtoi ajo.

Kur u pyet se si planifikon të ilustrojë temën e hakmarrjes, ajo tha: “Albumi i gjashtë i Taylor, Reputation, është rikthimi i saj pasi u zhduk nga qendra e vëmendjes për shkak të konflikteve me Kim Kardashian dhe Kanye West”.

“Ajo bën hakmarrjen e saj ndaj tyre – dhe peizazhit më të gjerë mediatik – duke lëshuar një album jashtëzakonisht të suksesshëm së bashku me një turne në stadium”, u shpreh mes tjerash ajo.

Tema do t’i ndihmojë studentët të kuptojnë pse koncepti i hakmarrjes mund të jetë kaq i papërmbajtshëm.

“Por a e dinë ata pse na pëlqen hakmarrja? A e dinë ata se si ne hakmerremi? Psikologjia sociale mund të na thotë”, vazhdoi ajo.

Wormley vuri në dukje se kursi nuk do të jetë ‘një takim tre-orësh i klubit të fansave’ dhe ajo shpreson që dikush që nuk është një fans i këngëtares të marrë kursin. /Telegrafi/