Ish-presidenti ukrainas nuk u lejua të largohej nga Ukraina, derisa po udhëtonte në Lituani për një takim

Ish-presidenti ukrainas nuk u lejua të largohej nga Ukraina për të marrë pjesë në një takim të një organi të NATO-s në Lituani, ka thënë fraksioni parlamentar i partisë së tij.

Sipas medieve të huaja, përcjell Telegrafi, Petro Poroshenko u ndalua dy herë në një pikë kufitare me Poloninë, derisa po udhëtonte për një takim të asamblesë parlamentare të NATO-s, ku do të takonte Presidentin e Lituanisë, Gitanas Nauseda, tha Solidariteti Evropian.

Në një deklaratë grupi parlamentar tha: “Poroshenko kishte marrë të gjitha lejet formale për t’u larguar nga vendi dhe ishte përfshirë në delegacionin zyrtar të Parlamentit të Ukrainës për këtë ngjarje”.

Mediat ukrainase raportuan se Poroshenko nuk mund të kalonte kufirin për shkak të “problemeve teknike” me një leje që e lejonte të largohej nga vendi.

Në janar, Poroshenko fitoi një vendim gjykate që e lejonte të qëndronte në liri derisa po hetohej për tradhti në një hetim që ai thotë se ishte një sulm i motivuar politikisht i lidhur me aleatët e pasardhësit të tij, presidentin Volodymyr Zelenskyy.

Ish-presidenti po hetohet në lidhje me financimin e separatistëve të mbështetur nga Rusia në lindje të vendit përmes shitjeve të paligjshme të qymyrit në vitin 2014-15. /Telegrafi/