Intervista pasionante me një anglishte të rrjedhshme nga Chiellini u ka lënë përshtypje të mëdha tifozëve

Kapiteni i Italisë, Giorgio Chiellini dha një intervistë pasionante pas ndeshjes në një anglishte të pabesueshme pasi Italia mposhti Anglinë në finalen e Euro 2020.

Mbrojtësi i Juventusit ishte pjesë e një mbrojtjeje të fortë së bashku me Leonardo Bonucci që kufizoi Anglinë në vetëm dy goditje në portë gjatë 120 minutave në finalen e të dielës së kaluar.

Chiellini u paraqit shkëlqyeshëm gjatë gjithë turneut pavarësisht se kishte një dëmtim të vogël dhe arriti trofeun e tij të parë madhor me Italinë.

Ndërsa Chiellini u kritikua shumë për ndërhyrjen e tij cinike ndaj Bukayo Saka në minutat e fundit të lojës, ai u duartrokit për shfaqjen e tij të përgjithshme dhe impresionoi me rrjedhshmërinë e tij të shkëlqyeshme në anglisht pas ndeshjes.

“Ishte një ndeshje e vështirë. Ne filluam në mënyrën më të keqe të mundshme me Anglinë që shënoi pas dy minutash”, ka thënë fillimisht Chiellini pas ndeshjes.

“E vështirë për ne me të gjithë tifozët në stadium duke u dhënë atyre energji për të fituar. Por, ne ishim të qetë dhe të durueshëm, gjë që ishte e rëndësishme”.

what🤌🏼an🤌🏼interview🤌🏼 pic.twitter.com/TTLoiMHWlP

— Matthew (@matthewd67) July 13, 2021

“Pastaj filluam të luanim, të luanim, të luanim. Gjetëm pasimin e duhur, gjetëm goditjen e duhur. Kjo është mënyra për të fituar”.

Më vonë në intervistë, italiani shprehu gëzimin e tij për fitimin e trofeut të tij të parë të madh me Azzurrët.

“Është një ëndërr e vërtetë. Është e pabesueshme. Ne kemi ndjerë një magji në fillim të garës dhe është rritur dita ditës”.

“Ndiheshim mirë brenda që nga arritja në Wembley, është shumë e vështirë, por unë jam shumë i lumtur, më shumë se i lumtur. Ne kemi parë imazhin e Fabio Cannavaros dhe tani jemi me fat tërësisht”, përfundoi italiani. /Telegrafi/