Interi ka fituar pa vështirësi në shtëpi ndaj Hellas Verona me rezultat 2-0 në ndeshjen e vlefshme për javën e 32-të në Serie A.

Ekipi i Simone Inzaghit ka vazhduar me fitore në kampionat dhe i është ofruar në vetëm një pikë liderit, Milanit, në garën për titull kampioni.

Pjesa e parë e ndeshjes u karakterizua me dominim të Nerazzurrëve, të cilët përveç rasteve arritën t’i shënojnë edhe dy gola.

Goli i parë i ndeshjes erdhi në minutën e 22-të dhe ishte Nicolo Barella, i cili shënoi për epërsinë 1-0 pas asistimit të Ivan Perisic.

Për golin e dytë u përkujdes sulmuesi boshnjak, Edin Dzeko (30’) që shënoi nga afërsia për 2-0.

Në pjesën e dytë, u zhvillua lojë thuajse e barabartë, me Veronën që tentonte ta ngushtonte epërsinë dhe Interin që luante kujdesshëm.

Deri në fund, pati raste nga të dyja skuadrat, por pa arritur t’i ndryshojnë shifrat dhe Interi i gëzua në fund fitores me rezultat 2-0.

Pas kësaj fitore, Interi e sheh veten në pozitën e dytë me 66 pikë, ndërsa Verona zë vendin e nëntë me 45 pikë.

Në ndeshjen e radhës, Nerazzurrët udhëtojnë te Spezia, ndërsa Verona udhëton te Atalanta. /Telegrafi/