Dy skuadrat e mëdha evropiane, Inter dhe Manchester City janë futur në bisedime për dy futbollistë.

Skuadra e Pep Guardiolës prej vitesh e kërkon mbrojtësin sllovak Milan Skriniar dhe synon afrimin e tij gjatë afatit kalimtar veror.

Kjo ka bërë që Interi të mendoj për një shkëmbim të mundshëm me Cityn, pasi Neroazzurët i kanë kërkuar legjendën e klubit Kun Aguero.

Argjentinasi mbetet një ëndërr për Interin dhe skuadra zikaltër synon që ta marrë Agueron për ta zëvendësuar Lautaro Martinezin që pritet të largohet në drejtim të Barcelonës.

Vlerësimi i të dy futbollistëve është përafërsisht i njëjtë në tregun e transferimeve, pasi shuma e tyre sillet rreth 70 milionë euro.

Sipas asaj që kanë raportuar mediat italiane drejtuesit e dy skuadrave po bisedojnë për një shkëmbim kokë më kokë të dy lojtarëve.

Nëse ndodh ky shkëmbim, atëherë padyshim se do të ishte njëri nga më të mëdhenjtë në vitet e fundit pas atij mes Juventusit dhe Barcelonës me dyshen Pjanic-Arthur.

Vlen të theksohet se për shkak të pandemisë Covid-19 skuadrat e mëdha evropiane po kanë probleme financiare dhe shumica e transferimeve pritet të jenë në formë shkëmbimesh. /Telegrafi/