Hysaj kërkon vendin e dytë me Napolin

Elseid Hysaj kërkon vendin e dytë në kampionatin italian Serie A.

Mbrojtësi i Shqipërisë dhe skuadrës italiane Napoli, ka folur për mediat italiane për objektivat e klubit.

Pasi janë dorëzuar tanimë në luftën për titull të kampionit, Hysaj ka thënë se Napoli synon t’ia rrëmbejë vendin e dytë Romës.

“Vendi i dytë në kampionat është objektiv i qartë në kokat e të gjithëve, ne futbollistëve që luajmë për Napolin dhe nuk është asgjë e pamundur”.

“Janë të paktë ata që e besojnë se në fund të garës do ta arrimë, por unë besoj fort se gradualisht do ta kalojmë Romën. Po kalojmë një moment të mirë dhe besoj se deri në fund do të vazhdojmë kështu”, ka deklaruar Hysaj.

Mbrojtësi shkodran ka folur edhe për ëndrrën e madhe të ekipit për ta fituar titullin e kampionit në Itali.

“Titullin e kampionit për ta fituar është një dëshirë e të gjithëve, e jona si futbollist dhe e tifozëve të Napolit”.

“Me tifozët kam një raport shumë të mirë, pasi kam marrë mbështetjen e tyre gjithmonë. Do të ishte fantastike që atyre t’ia ofrojmë titullin e kampionit pasi ky qytet të ofron emocione të mëdha”, ka përfunduar Hysaj.

Kujtojmë që mbrojtësi shqiptar iu bashkua Napolit nga skuadra tjetër italiane Empoli. /Telegrafi/