Hera e parë që nga ardhja në pushtet, presidentja hungareze vendos veto në ligjin e Orbanit

Presidentja e Hungarisë, Katalin Novak ka hedhur poshtë një ligj të ri që kufizon të drejtat e homoseksualëve dhe transgjinorëve. Ndër të tjera, ligji i planifikuar parashikon që qytetarët mund të raportojnë në mënyrë anonime çiftet e të njëjtit seks që rrisin fëmijët së bashku.

Ligji i diskutueshëm u miratua në parlament në fillim të këtij muaji me votat e partisë qeverisëse Fidesz të kryeministrit Viktor Orban. Ligji është i përbërë nga dispozita për mbrojtjen e qytetarëve që duan të raportojnë mangësitë dhe shkeljet në institucione dhe kompani ndërsa përmban një seksion që lejon njerëzit të dënojnë bashkëqytetarët për arsye ideologjike.

Kjo mund të bëhet, për shembull, nëse dikush vë në dyshim rolet tradicionale gjinore dhe idealet familjare të parashikuara në kushtetutë ose të drejtën e fëmijës për “identitet sipas seksit të përcaktuar në lindje”. Kjo do të thotë se, sipas ligjit, çiftet e të njëjtit seks që rrisin fëmijët së bashku mund të raportohen në mënyrë anonime, raporton evropaelire.

Megjithatë, teksti ligjor nuk është në përputhje me direktivat e Bashkimit Evropian, i cili duhet të mbrojë sinjalizuesit në institucione dhe kompani, ka shkruar Novak në një letër drejtuar parlamentit.

Kjo është hera e parë gjatë drejtimit të populistit të djathtë Orban që kreu i shtetit kundërshtoi një ligj shumë të rëndësishëm për të. Novak, si paraardhësit e saj që nga viti 2010, është gjithashtu anëtare e partisë në pushtet.

Nën sundimin e Orbanit, parlamenti ka miratuar tashmë disa ligje që kufizojnë të drejtat e homoseksualëve dhe transgjinorëve. Në ndryshimin e kushtetutës, për shembull, tani thuhet se “babai është burrë dhe nëna është grua”.

Vetoja do të thotë që parlamenti tani duhet të rinegociojë ligjin. Megjithatë, ai mund të kalojë sërish në një version të pandryshuar dhe presidenti nuk mund të vërë sërish veton ndaj tij. /Telegrafi/