Gjyqtari i njohur boshnjak, Bojan Makaric nga Bijeljina, është sulmuar dhe rrahur brutalisht gjatë një turneu në futsall që po zhvillohej në Brezovo Polje.
Makaric, i cili edhe këtë sezon është pjesë e listës B të gjyqtarëve për Ligën e Bosnjë dhe Hercegovinës, në rolin e gjyqtarit asistent, ishte duke referuar ndeshjen kur ndaj tij u vërsul njëri prej lojtarëve. Identiteti i sulmuesit ende nuk është bërë publik.
Incidenti ka marrë përmasa serioze, ndërsa një fotografi shqetësuese e publikuar nga portali PravdaBL dëshmon pasojat e sulmit ndaj gjyqtarit.
Rasti është konfirmuar edhe nga Policia e Distriktit të Brçkos, e cila ka bërë të ditur se incidenti është raportuar më 18 gusht, rreth orës 23:07.
Sipas policisë, është raportuar se një lojtar e kishte goditur gjyqtarin në kokë gjatë një ndeshjeje futbolli në Brezovo Polje dhe se ishte e nevojshme ndërhyrja e shërbimit të urgjencës mjekësore.
Menjëherë pas raportimit, zyrtarët policorë kanë dalë në vendin e ngjarjes dhe kanë mbledhur informacionet e para. Ndërkohë, miqtë e të dëmtuarit e kanë dërguar atë në Bijeljina për kontroll mjekësor.
Rreth orës 00:10, Policia e Distriktit të Brçkos është njoftuar nga Policia e Bijeljinës se gjyqtari ndodhej në shërbimin e urgjencës, pasi kishte pësuar lëndime gjatë ndeshjes.
Mjeku nuk ka mundur të përcaktojë menjëherë shkallën e lëndimeve, pasi ishte e nevojshme kryerja e një CT-je të kokës.
Policia ka bërë të ditur se, pas mbledhjes së të gjitha informacioneve dhe fakteve lidhur me rastin, do të ndërmerren masat dhe veprimet e parapara me ligj.
Sulmi ndaj Makaric ka shkaktuar shqetësim në futbollin boshnjak, veçanërisht pasi bëhet fjalë për një gjyqtar me përvojë, i cili prej vitesh ka arbitruar ndeshje në elitën e futbollit të Bosnjë dhe Hercegovinës. /Telegrafi/
