Ferizaj ka marrë një fitore të madhe në udhëtim te Dukagjini i Klinës.

Skuadra e udhëhequr nga Bekim Isufi ka triumfuar si mysafir i ekipit nga Klina me rezultat minimal 0-1.

Pjesa e parë përfundoi ashtu siç filloi me rezultat të barabartë 0-0.

Ndërkohë në pjesën e dytë dy skuadrat luajtën futboll më sulmues për të kërkuar golin e fitores.

Ferizaj e arriti një gjë të tillë, pasi në minutën e 85-të gjetën golin e fitores me anë të Edon Sadriut.

Kësisoj për Ferizajn kjo ishte fitorja e dytë në këtë kampionat dhe që të dyja i mori jashtë fushës së vet.
Pas kësaj fitore Ferizaj zë pozitën e gjashtë në tabelë me gjashtë pikë, ndërsa Dukagjini mbetet e fundit me vetëm një pikë.

Ndeshjen e radhës Dukagjini përsëri do ta luaj në shtëpi, ku pret kampionin në fuqi Feronikelin.

Në anën tjetër Ferizaj do të luaj para adhuruesve të vet përballë Drenicës. /Telegrafi/