Sikurse edhe shumë ngjarje kulturore, festivale, e koncerte edhe “Sunny Hill” është shtyrë për vitin 2021.

Kjo, për shkak të sigurisë së popullsisë në mes të kësaj krize globale, e cila rrezikon shëndetin nëse qëndrohet në grupe.

Një gjë e tillë është bërë e ditur përmes rrjetit social Facebook, ku faqja zyrtare e këtij festivali ka njoftuar se festivali nuk do të mbahet këtë vit.

“Me keqardhje ju informojmë se ‘Sunny Hill Festival 2020’ nuk do të zhvillohet këtë gusht, për shkak të krizës globale të shkaktuar nga COVID-19. Shëndeti dhe siguria e pjesëmarrësve të festivalit, stafit tonë, partnerëve, artistëve tanë, miqve dhe komuniteteve të përgjithshme të festivalit është më shumë rëndësi për të gjithë ne”, thuhet në njoftim.

Në po të njëjtin njoftim, ekipi i festivalit paralajmëruan shumë gjëra të mëdha në vitin 2021.

“Tashmë ne mezi presim të takohemi përsëri në gusht të vitit 2021 me shumë gjëra të mëdha që na presin përpara. Vendndodhja e re, formimi më i mirë i artistëve, fushat më të mëdha dhe zonat ftohëse, amfiteatri i ri natyror, janë vetëm disa prej tyre”, thuhet më tej.

“Ndërsa jemi të trishtuar që nuk e festojmë së bashku këtë verë, nuk mund të presim që të takohemi përsëri në 2021”, ka theksuar ekipi i festivalit.

Në fund ata nuk harruan të bëjnë thirrje për të gjithë qytetarët që të kujdesen për veten në kohë të kësaj pandemie globale. /Telegrafi/