Ferizaj në gjendje të vështirë financiare, klubi rrezikon të mos i vazhdojë garat

Klubi i futbollit Ferizaj, tash e disa kohë ka hasur në vështirësi financiare, por këtë vit po ndjehen më shumë.

Edhe përkundër këtyre problemeve, drejtori sportiv, Nadir Haxhimusa, kishte arritur të ndërtojë një skuadër të fortë për Ligën e Parë, duke mbledhur 19 pikë, që e mbajnë në pozitën e katër dhe me gjasa për tu kthyer në elitë.

Po ashtu ky ekip ka kaluar edhe në 1/8 e Kupës së Kosovës ku do të takohet me Trepçën ’89.

Por çështja financiare e klubit është e rënduar dhe klubi rrezikon të mbetet pa lojtarë, pasi aksionarët e klubit nuk iu përgjigjen përgjegjësive që kanë marr.

Mësohet se asnjë nga lojtarët e ekipit të parë nuk ka pranuar të dal në stërvitje, ndërsa trajneri Burim Çerekini, ka filluar me lojtar të rinj.

Vonesën e pagave dhe mungesën e lojtarëve e ka pranuar për Telegrafin edhe drejtori sportiv, Nadir Haxhimusa, duke dhënë një prononcim të shkurtër vetëm për këtë çështje.

“Është e vërtet që situata financiare në klub nuk është e mirë. Rrezikojmë të mos i nisim garat në pranverë, pasi ka kohë që situata është kështu. Nëse nuk ndodh ndonjë mobilizim, atëherë do të jetë e vështirë për ne”, ka thënë ai.

Ferizaj në vitet e fundit ka hasur në vështirësi financiare, ku shpesh herë vonesat e pagave, kanë qenë lajm nga ky qytet, e jo sukseset e klubit. /Telegrafi/