Fagioli zbulon se Tonali ia dha aplikacionin e paligjshëm të basteve, tregon edhe për borxhet e mëdha dhe paratë e huazuara nga bashkëlojtarët

Gjatë një marrjeje në pyetje me Prokurorin e FIGC muajin e kaluar, mesfushori i Juventusit, Nicolo Fagioli zbuloi se Sandro Tonali i kishte shpjeguar se si të përdorte një aplikacion për baste të paligjshme ndërsa ishte në detyrë ndërkombëtare me Italinë U21 gjatë vitit 2021.

Gazeta italiane Tuttosport publikoi dokumentet e intervistës së Fagiolit me prokurorin e FIGC Giuseppe Chine në shtator 2023.

Fagioli pranoi se kishte grumbulluar borxhe dhe ishte kërcënuar nga pronarët e platformave të paligjshme të basteve, të cilëve u kishte borxh para. Ai tha se filloi të luante kumar sepse kishte “shumë kohë të lirë”.

“Ne stërviteshim në mëngjes dhe unë luaja kumar pasdite për të vrarë mërzinë dhe për të përjetuar emocionet”, ka pranuar fillimisht Fagioli.

Ai gjithashtu zbuloi se mesfushori i Newcastle, Tonali i kishte sugjeruar atij një aplikacion për të vendosur baste të paligjshme. Fagioli tha se kjo ndodhi në vitin 2021 ndërsa ata ishin në detyrë ndërkombëtare me Italinë U21.

“E pashë atë [Tonalin] duke luajtur dhe e pyeta se çfarë po bënte. Ai tha se mund ta bëja edhe unë sepse nuk do të linte asnjë gjurmë, ndaj më detyroi të regjistrohesha në llogarinë time. Kam vënë bastet e mia të para në tenis dhe më pas në futboll. Kam përdorur edhe platforma të tjera të paligjshme, nuk i mbaj mend të gjithë emrat sepse ato ndryshonin çdo muaj”.

Gjatë marrjes në pyetje, Fagioli iu referua Tonalit si një “mik i ngushtë”.

“E nisa në verën e vitit 2021 kur luaja me Italinë U21 në Tirrenia. Asnjëherë nuk e kam pyetur veten nëse një platformë është e ligjshme apo e paligjshme”.

“Dallimi ishte se unë mund të luaja pa paguar paraprakisht përmes platformave të paligjshme. Doja të mbysja kohën. Kryesisht luajta tenisin për një vit, më pas, nga janari 2022, isha në një gjendje stresi sepse kisha borxhe të grumbulluara dhe nga shtatori i të njëjtit vit fillova me futbollin, duke vënë baste shuma të mëdha për t’u rikuperuar”.

Fagioli tha gjithashtu se kishte grumbulluar aq shumë borxhe saqë iu desh të merrte para hua nga disa nga shokët e tij të Juventusit, të cilët nuk ishin në dijeni të problemeve të tij.

Italiani është pezulluar për shtatë muaj, ndërsa Tonali u dëgjua nga prokurorët e Torinos dhe FIGC në fillim të kësaj jave. Mesfushori i Newcastle duket më shumë në telashe sesa bashkëkombësi i tij, pasi dyshohet se ka luajtur kumar në ndeshjet e Milanit ndërsa ishte nën kontratë me kuqezinjtë. /Telegrafi/