Edhe Shota Baraliu në mesin e grevistëve të ndërmarrjes “Pastrimi” në Prishtinë – aktorja që prej vitesh punon në këtë ndërmarrje publike

Një grevë e punëtorëve të ndërmarrjes publike “Pastrimi” është duke u zhvilluar sot para objektit të Komunës së Prishtinës, si reagim ndaj problematikave të vazhdueshme ndërmjet kësaj ndërmarrjeje dhe institucionit komunal.

Punëtorët po kërkojnë zgjidhje urgjente për një sërë çështjesh që, sipas tyre, po ndikojnë drejtpërdrejt jo vetëm në mirëqenien e tyre, por edhe në gjendjen ambientale të kryeqytetit, e cila është përkeqësuar ndjeshëm kohëve të fundit.

Në mesin e grevistëve është parë edhe aktorja e njohur shqiptare, Shota Baraliu, e cila, ndonëse e njohur për rolet e saj në skenën teatrore dhe televizive, prej vitit 2019 punon në Departamentin e Marketingut të kësaj ndërmarrjeje publike.

Telegrafi ka siguruar disa fotografi ekskluzive ku Baraliu shihet përkrah kolegëve të saj, duke mbështetur kërkesat e grevistëve dhe duke shprehur shqetësimin për mosveprimin institucional ndaj gjendjes së rëndë në të cilën ndodhet ndërmarrja.

Punëtorët e “Pastrimit” shprehen të vendosur për të vazhduar me protestën deri në marrjen e një përgjigjeje konkrete nga ana e Komunës së Prishtinës, ndërsa qytetarët ndërkohë po përballen me ndotje të shtuar dhe mbeturina të pa menaxhuara në pjesë të ndryshme të kryeqytetit. /Telegrafi/