Drita ka shënuar fitore në udhëtim te Tre Fiori, në ndeshjen e parë për raundin e tretë kualifikues të Ligës së Konferencës.
“Intelektualët” morën një triumf 1-4, duke bërë që të kenë avantazhin para përballjes kthyese që zhvillohet javën tjetër në “Fadil Vokrri”.
Drita e nisi shumë më mirë për të dominuar plotësisht në posedim por që assesi nuk ia doli t’i finalizonte aksionet.
Megjithatë, ishin vendasit që i lanë të shtangur të gjithë për të zhbllokuar rezultatin. Sami dhuroi një pasim të gjatë për Prandelli, i cili pas një pranimi të bukur të topit e mposhti Malokun (56’).
Mirëpo, gëzimi i vendasve zgjati katër minuta. Ovouka u gjend në vendin e duhur për të përfituar nga një top i kthyer dhe barazuar rezultatin (61’).
Kurse, vetëm dy minuta më vonë Blerim Krasniqi pas një asistimi të bukur realizoi me kokë për ta përmbysur epërsinë (63’).
Fitoren e Dritës në fund e vulosi Besnik Krasniqi pas një aksioni të shpejtë (82’).
Krejt në fund, skuadra gjilanase e gjeti sërish rrugën drejtë rrjetës - në fund falë Krasniqit, nga pika e bardhë (90+4').
Kësisoj, Drita i afrohet play-offit, por që duhet ta sigurojë një javë më vonë – aty ku do të përballet me fituesin e ndeshjes Inter Escaldes – Flora, ku sfida e parë përfundoi me rezultat 2-0 në të mirë të klubit nga Andorra./Telegrafi/
