Kur përmendet fjala futboll, kur mendohet rresh sportit më të popullarizuar dhe kur ai luhet, mendja shkon vetëm te një njeri – Lionel Messi.
Ai është identiteti i sportit më të popullarizuar në botë. Gjërat që ai i bën në fushë nuk kanë lidhje me sport, por me artin dhe kulturën – bukurinë që shijojnë sytë e atyre që kanë fatin të jetojnë në epokën e tij.
Ende në diskutim si futbollisti më i mirë në histori, dyshime për të cilën gjë po zvogëlohen dita ditës – Messi për këtë epitet ka kohë që e ka gravuar veten në historinë e klubit të tij, Barcelonës – duke qenë tashmë një legjendë e gjallë.
Kur flitet për Barcelonën, është e pamundur të mos flasësh për Messin, e kur flet për Messin, e pamundur është të mos flasësh për krejt futbollin – kësisoj, Barca dhe Messi reprezentojnë futbollin modern.
Njëra pa tjetrën nuk kanë kuptim, futbolli nuk ka kuptim.
Messi debutoi më 16 tetor të vitit 2004, plot 13 vjet më parë.
Ai gjatë kësaj kohe u paraqit 583 herë në fanellën e Barcelonës, secilën ndeshje më shumë i angazhuar se sa në ndeshjen e kaluar, e më pak se sa në ndeshjen e tij të ardhshme.
Gjatë kësaj kohe ai shënoi 507 gola, duke realizuar me secilën prej tyre vepra artistike, të cilat jo vetëm ndihmuan Barcelonën drejt titujve, por që kanë shkruar historinë e futbollit me ngjyra të arta të cilat do të inspirojnë gjenerata të tëra për t’u marrë me sport, për të realizuar ëndrrën e tyre – për t’u bërë sikur Messi.
Messi ka fituar katër trofe të Ligës së Kampionëve, duke shtuar lavdinë mbi historinë e klubit me një brend modern të futbollit në një epokë të pa përsëritshme të futbollit në shekullin 21.
2021 është viti kur atij do t’i skadojë kontrata e re pas rinovimit të mërkurën gjatë ditës.
Kontratë kjo që reprezenton përkushtimin, besnikërinë dhe dashurinë ndaj klubit të tij dhe tifozëve të Barcelonës, cilësi këto që shoqëruan Lionel Messin për 13 vjet prej se këmba e tij shkeli për herë të parë në fushë me fanellën e Barcelonës.
Ai nuk ndryshoi në asnjë moment për 13 vjet dhe do të mbetet i tillë për tifozët e Barcelonës dhe gjithë futbollit deri në fund të karrierës së tij, deri në fund të jetës së tij e madje edhe për shekuj tjerë të tërë...
/Telegrafi/
