Çfarë mund të bëni ju për parandalimin e kancerit

Rreth 70 për qind e rasteve të kancerit mund të parandalohen. Nëse e bëni një mënyrë jetese të shëndetshme, nuk keni nevojë të frikësoheni nga kanceri. Sigurisht, gjithmonë ka përjashtime, por personi që ha ushqim të shëndetshëm, ushtron rregullisht, konsumon alkool në sasi të moderuar, nuk pi duhan dhe nuk abuzon me drogat, bën shumë për shëndetin e tij.

Ekzistojnë disa hapa të cilët mund t’i ndërmerrni edhe vetë që ta ulni sa më shumë rrezikun e shfaqjes së kancerit.

Marinojeni mishin para pjekjes. – Mishi mund të përmbajë kompozime që janë kancerogjene, sidomos mishi i pjekur në skarë. Që ta reduktoni sa më shumë përqindjen e komponimeve kancerogjene, mishin marinojeni para pjekjes.

Erëzat më të mira janë rozmarina dhe trumza, por nuk do të gaboni me asnjë erëz bimore, sepse të gjitha përmbajnë antioksidantë të cilët e reduktojnë përqindjen e komponentëve dëmtues deri në 87 për qind.

Pini ujë të filtruar. – Në këtë mënyrë do ta zvogëloni ekspozimin e trupit ndaj kompozimeve të dyshimta. Uji i filtruar është madje edhe më i sigurt se sa uji i ambalazhuar. Uji i ambalazhuar shpesh nuk është i cilësisë aq të mirë dhe në shumë raste është më pak i shëndetshëm se uji në rubinet.

Pini kafe çdo ditë. – Njerëzit që pinë nga 4 filxhanë kafe në ditë kanë një rrezik 40 për qind më të ulët të zhvillimit të kancerit në tru. Kafja pa kafeinë nuk e ka të njëjtin efekt. Gjithashtu, mund të pini çajra të cilët përmbajnë kafeinë, si çaji i gjelbër, sepse shkencëtarët kanë konstatuar se edhe ata ndihmojnë në parandalimin e kancerit.

Pini shumë ujë. – Një trup i hidratuar mirë është një trup i shëndetshëm. Një sasi adekuate e ujit do ta përmirësojë funksionin e veshkave. Pini të paktën tetë gota ujë në ditë. Në këtë llogaritni të gjitha që përmbajnë ujë, duke përfshirë supat, gjellët dhe frutat me përmbajtje të ujit.

Rriteni konsumin e perimeve të gjelbra. – Herën tjetër kur të përgatitni sallatë, zgjidhni perime të gjelbra. Ato janë një burim i shkëlqyer i klorofilit dhe magnezit. Gjithashtu e zvogëlojnë rrezikun e kancerit të zorrës së trashë tek femrat. Magnezi është i nevojshëm për funksionimin e duhur të çdo qelize në trup.

Hani arra braziliane. – Ato janë një burim i shkëlqyer i selenit, i cili ka efekt antioksidues dhe ul rrezikun e kancerit të fshikëzës tek femrat. Studimet kanë treguar se ato mund ta zvogëlojnë rrezikun e kancerit të mushkërive dhe kancerit të zorrës së trashë.

Ushtrimet e rregullta. – Ushtrimet e moderuara, si ecja e shpejtë, 2 orë në javë mund ta reduktojnë ndjeshëm rrezikun nga kanceri. Në qoftë se i digjni kaloritë e tepërta, e reduktoni përqindjen e yndyrës dhe e rritni përqindjen e muskujve, trupi juaj do të bëhet rezistues.

Rriteni konsumin e kalciumit. – Kalciumi është shumë i rëndësishëm për ndërtimin e kockave dhe funksionimin e duhur të çdo qelize të trupit. Personat të cilët konsumojnë sasi të mjaftueshme të kalciumit, kanë një rrezik më të ulët të zhvillimit të polipeve në zonën e zorrës së trashë.

Shmangni rrezatimet e panevojshme diagnostike. – Imazhet radiologjike të CT janë të shkëlqyera për diagnostifikim, por mund të ekspozoheni ndaj rrezatimit të panevojshëm. Nivelet e larta të rrezatimit mund të shkaktojnë leukemi. Konsultohuni mirë me mjekun tuaj për çdo ekzaminim radiologjik dhe analizë për t’u siguruar që me të vërtetë keni nevojë për to. /Telegrafi/