Britanikët i vendosin sanksione të reja Bjellorusisë

Mbretëria e Bashkuar ka njoftuar një paketë të re sanksionesh kundër Bjellorusisë për rolin në lehtësimin e pushtimit rus të Ukrainës.

Legjislacioni përfshin ndalime importi dhe masa të reja që synojnë parandalimin e propagandës në internet, raporton skynews.

Paketa konsiston gjithashtu në ndalimin e importit të arit, çimentos, drurit dhe gomës nga Bjellorusia dhe bllokimin e eksporteve në Bjellorusi nga Britania të kartëmonedhave dhe makinerive, si dhe mallrave, teknologjive dhe materialeve që mund të përdoren për prodhimin e armëve kimike dhe biologjike.

Lexo po ashtu Rusët publikuan pamjet e rrëzimit të një droni, por doli të jetë fluturakja e tyre

Qeveria tha se do të ishte në gjendje të parandalonte kompanitë e caktuara të medias bjelloruse nga “përhapja e propagandës në Britani” me kompanitë e mediave sociale dhe ofruesit e shërbimeve të internetit që kufizojnë qasjen në faqet e internetit të organizatave të sanksionuara.

Bjellorusia, e udhëhequr nga presidenti Aleksandër Lukashenko që nga viti 1994, është aleati më i vendosur i Rusisë midis ish-shteteve sovjetike.

Lukashenko lejoi që territori bjellorus të përdoret për të nisur pushtimin e Ukrainës nga Kremlini në shkurt të vitit të kaluar.

Legjislacioni gjithashtu do të godasë ata që shmangin sanksionet, duke përfshirë kufizimin e fondeve që Bjellorusia mund të mbledhë duke kufizuar më tej qasjen e Bjellorusisë në tregjet financiare të Mbretërisë së Bashkuar. /Telegrafi/