0Shares

Usain Bolt ka debutuar për skuadrën nga A-League, Central Coast Mariners, me dy gola kundër Macarthur South West në një miqësore para-sezonale.

Bolt, mbajtësi i rekordeve botërore në 100 metra dhe tetë herë fituesi i medaljes së artë olimpike, u bashkua me Central Coast në muajin gusht.

Nënshkrimi i tij me Central Coast Mariners erdhi pas kalimit të provave te skuadra australiane.

Sot (e premte) erdhi debutimi i atletit me skuadrën australiane gjatë një miqësore para-sezonale me Macarthur South West.

Bolt luajti në vijën e sulmit dhe arriti të shënoj dy gola në këtë ndeshje debutuese.

Goli i tij i parë erdhi në minutën e 55-të për epërsinë 3-0 me një të majtë të fuqishme, ndërsa goli i dytë erdhi në minutën e 68-të, kur ai shfrytëzoi një gabim të mbrojtjes.

Atleti xhamajkan kishte një numër shansesh të tjera para se të zëvendësohet në minutën e 75-të, por mori notë kaluese në debutimin e tij.

“Fillimi im i parë dhe shënimi i dy golave, është një ndjenjë e mirë”, ka thënë fillimisht Bolt pas ndeshjes.

“Jam i lumtur që mund të vij këtu dhe t’i tregoj botës që jam duke u përmirësuar. Jam i gatshëm të jem Marinar, të luaj më të mirën dhe të futem në ekip”, përfundoi xhamajkani. /Telegrafi/

Të Ngjajshme
Shfaq Komentet (0)