Beqaj: Gratë ndërmarrëse janë shtyllë e rëndësishme e ekonomisë

Ministri i Inovacionit dhe Ndërmarrësisë, Besim Beqaj, gjatë takimit me përfaqësuesit e Dhomës Ekonomike të Grave të Kosovës (G7), ka thënë se gratë ndërmarrëse janë shtyllë e rëndësishme e ekonomisë.

Beqaj i ka ftuar gratë ndërmarrëse që të aplikojnë për mbështetje financiare, duke theksuar se mbështetja e grave ndërmarrëse të Kosovës është njëri nga objektivat e ministrisë, pasi niveli i ndërmarrjeve të udhëhequra nga gratë është i ulët.

“Gratë ndërmarrëse të Kosovës është dëshmuar se kanë potencial ndërmarrës dhe qëllimi i Programit për mbështetje financiare është fuqizimi ekonomik i grave dhe ngritja e potencialit prodhues dhe shërbyes të NVM-ve për rritje të eksportit të produkteve dhe shërbimeve”, tha Beqaj.

Ai ka thënë se po ashtu se gratë ndërmarrëse janë shtyllë e rëndësishme ekonomike në të cilën duhet të investohet më shumë nga shteti me përkrahje financiare, duke shtuar se projektet e grave do të trajtohen me prioritet, pasi objektiv kryesor i ministrisë është përkrahja e grave ndërmarrëse.

Arieta Vula-Pozhegu, anëtare e Bordit të G7, tha se shpreson se nuk do të mungoj përkrahja e nga ministria.

Gratë anëtare të G7-së kanë shfaqur interesimin e tyre për Programin e financimit të NVM-ve dhe mundësitë për përfitim të përkrahjes financiare për ndërmarrjet e tyre, me theks në mundësitë e përfitimit nga ndërmarrjet e udhëhequra nga gratë.

Në fund, janë ftuar gratë ndërmarrëse që të aplikojnë për përkrahje financiare me projektet e tyre konkrete që ndikojnë në krijimin e vendeve të reja dhe fuqizimin e ekonomisë së Kosovës përmes dixhitalizimit. /Telegrafi/