Barcelona kishte shitur Neymarin verën e kaluar për 222 milionë euro, por sa i përket blerjeve nuk i afrohet kësaj shumë, pasi ajo është dy herë më e lartë. 

Barcelona është në krye të klubeve për shpenzime, duke lënë pas 387 milionët eurot e Manchester City, ato të Paris Saint-Germain (373 milionë euro) dhe Liverpoolit (350 milionë euro).

Blerja e fundit e Barcelonës, është Malcom që erdhi për 41 milionë euro, plus 1 milion euro shtesë.

Pastaj i shtohen 31 milionë eurot e paguara për mesfushorin Arthur, me 9 milionë euro shpenzime tjera për brazilianin.

Pas tij vijnë 39.5 milionë eurot e harxhuara për nënshkrimin e Clement Lenglet, për ta arritur shumën e 107.9 milion eurove vetëm këtë verë.

Me kaq nuk ndalet, pasi Barcelona kishte nënshkruar me Philippe Coutinhon, i cili kushtoi 120 milion euro, plus 40 milion euro bonuse, transmeton Telegrafi.

Ndërsa zëvendësimi i menjëhershëm i Neymar, Ousmane Dembele, erdhi për 105 milion euro dhe 40 milionë euro të tjera në formë bonusesh.

Deri më tani së bashku me shtesat e paguara, shifra arrin në 384.7 milionë euro.

Shitjet e kësaj vere

Në anë tjetër duhet të llogariten edhe shitjet. Barcelona është e hapur për oferta për një numër lojtarësh.

Paulinhon ka shkuar te Guangzhou Evergrande si huazim me detyrim blerje prej 50 milionë eurove.

Javier Mascherano, Cristian Tello dhe Gerard Deulofeu, kanë pruar në arkat e klubit 22.5 milionë euro.

Kur shtohet dhe ajo e Neymarit (222 milionë euro), katalanasit kanë grumbulluar 244.5 milion euro nga shitjet.

Shpresa është që shuma të arrihet në 350 milionë euro, me shitjet e Jasper Cillessen, Aleix Vidal, Yerry Mina, Andre Gomes, Rafinha, Munir El Haddadi dhe disa të tjerë.

Një shumë e këtyre parave të tubuara mund të shkojnë për blerjet e Aleksander Golovin, Adrien Rabiot dhe Frenkie de Jong. /Telegrafi/