Leandro Paredes duket se do të jetë mesfushori më i ri i Chelseat.
Mesfushori argjentinas do të largohet nga skuadra ruse Zenit St Petersburg pas një viti e gjysmë.
24-vjeçari ka konfirmuar nëpërmjet ‘Twitterit’ se do t’i bashkohet Chelseat, kur ka pëlqyer një video që e lidh atë me klubin londinez.
Mediat angleze kanë raportuar se tanimë edhe dy klubet kanë arritur marrëveshje për transferimin e mesfushorit në Angli.
(Foto: Epsilon/Getty Images/Guliver)
Chelsea pritet të paguajë 30 milionë euro dhe pesë të tjera në formë bonusesh për Paredes.
Ish-anëtari i Romës do të nënshkruajë një kontratë katër vjeçare me klubin londinez.
Ka qenë trajneri Maurizio Sarri që ka këmbëngulur për transferimin e Paredesit, pasi dyshja kishin punuar së bashku te Empoli kur argjentinasi ishte huazuar nga Roma.
Zyrtarizimi i këtij transferimi pritet të bëhet gjatë ditëve të ardhshme. /Telegrafi/
