Zhdukja e dy vajzave në Pejë, Bajrami: Të çohet i gjithë shteti në këmbë derisa të gjenden

Ka një javë që janë zhdukur dy vajza nga Peja dhe ende nuk dihet diçka për fatin e tyre. 

Policia e Kosovës më 25 shtator kishte njoftuar se dy persona kanë raportuar në Polici se vajzat e tyre janë larguar nga shtëpitë dhe nuk janë kthyer më. Rasti i zhdukjes ka ndodhur më 23 shtator, ndërsa vajzat janë nga fshati Treboviq dhe Qyshk i Pejës.

Ndërkaq, sot deputetja e Lidhjes Demokratike të Kosovës, Hykmete Bajrami theksoi se duhet të çohet i gjithë shteti në këmbë derisa të gjenden dy vajzat.

Lexoni të plotë reagimin e Bajramit:

Sot një javë, dy studente nga Peja janë zhdukur. Vajzat sipas raportimeve kanë dalë nga shtëpitë e tyre fshati Qyshk e Treboviq dhe janë nisur për në Universitetin ‘Haxhi Zeka’ në Pejë.

Si nënë e dy vajzave ky lajm më ka tmerru dhe prej momentit që e kam dëgju nuk mendoj asgjë tjetër.

Për çudi, kjo ngjarje po kalon pa shumë vëmendje, pa shumë angazhim të shtetit, të institucioneve shtetërore.

Ku është Ministri i Brendshëm?

Ku është Policia e Kosovës?

Ku është Prokuroria e Shtetit?

Ku është Agjencia Kosovare e Inteligjencës?

Ku është Forca e Sigurisë së Kosovës?

Me kujtohet më 2003 kur kam qenë studente në Angli, u patën zhdukë 2 vajza 13 vjeçare. Me javë të tëra, derisa ato janë gjetur krejt kanalet televizive, krejt gazetat, krejt aparati shtetëror nuk kanë fol për asgjë tjetër pos për dy vajzat e zhdukura.

Te ne, për këtë rast ka heshtje pothuajse në të gjitha institucionet.

Në këtë situatë, ministri i Brendshëm, Kryeprokurori i Shtetit, Drejtori i Policisë bashkë me Shefin e AKI-së e edhe me Komandantin e FSK-së do të duhej të mbanin konferenca të përditshme. Për të treguar se çka po bëjnë institucionet për rastin.

Kjo është ngjarje e dhimbshme. Jam e sigurt se derisa vajzat të gjenden për familjet dhimbja është me e rëndë se vdekja.

Ju bëj thirrje të gjithëve kudo që jeni të kontribuoni në zbardhjen e rastit. Ndërsa, institucionet e shtetit, të gjitha bashkë edhe me mediat, të çohen në këmbë derisa të gjenden dy vajzat e zhdukura.

Ndryshe, babai i njërës nga të zhdukurat në një deklaratë për Klan Kosova ka thënë se nuk kanë ndonjë të dyshuar për zhdukjen e vajzës së tyre.

Ai bëri të ditur se vajza e tij së bashku me vajzën e dajës ka një javë që janë zhdukur.

Sipas tij, ata si prindër nuk kanë vërejtur diçka të dyshimtë tek vajzat ose se kanë probleme me dikë. /Telegrafi/