Ylli i French Open thotë se familja e tij ‘i mësoi Hitlerit për jetën’ dhe se janë nazistë në mesazhet e zbuluara nga WhatsApp

Braziliani Thiago Seyboth Wild është përfshirë në polemika të reja në French Open pas rrjedhës së mesazheve të WhatsApp që pretendojnë se ai ia ka pranuar ish të dashurës së tij: “Familja ime është naziste”. Tensiti i listuar si i 172-ti në botë shkaktoi një tronditje të madhe në Paris duke mposhtur numrin 2 të botës Daniil Medvedev në raundin e parë.

Por, ai më pas refuzoi t’u përgjigjej pyetjeve në konferencën e tij për shtyp pas ndeshjes në lidhje me akuzat me të cilat përballet në Brazil për abuzim në familje kundër ish-partneres së tij Thayane Lima. Ai nuk ka folur publikisht që atëherë  dhe 23-vjeçari humbi në raundin e tretë nga Yoshihito Nishioka i Japonisë.

Tani, gazeta braziliane O Globo ka publikuar mesazhe nga WhatsApp midis Lima dhe Seyboth Wild ku ai flet për historinë e familjes së tij.

Në njërën, ajo pyet: “Nënës suaj nuk i pëlqejnë homoseksualët, zezakët dhe hebrenjtë, apo jo?”. Thuhet se ai është përgjigjur: “Nga ana e nënës sime, familja ime është naziste”. Familja e Seyboth Wild i mohon këto komentet.

Në një mesazh tjetër ai vijon: “Preferova ta them tani sepse nëse nuk doni të shkoni atje (tek familjarët e tij), e kuptoj”.

Seyboth Wild gjithashtu pretendohet të ketë pohuar se ana e nënës së tij të familjes ishin personalitete naziste të cilët më vonë emigruan në Brazil pas Luftës së Dytë Botërore. “Stërgjyshi im, babai i babait të nënës sime ishte paraardhësi i Hitlerit”, shkroi ai. “Ishte ai që e solli nga Austria (vendi i lindjes së diktatorit) dhe i mësoi Hitlerit për jetën”.

Ai dërgoi gjithashtu foto të gjyshit të tij duke pozuar me udhëheqësit nazistë në vitet 1920 dhe 1930. Përfaqësuesit e Seyboth Wild i kanë mohuar O Globo ekzistencën e mesazheve.

Sipas gazetës, shkëmbimet janë të vitit 2019 dhe Seyboth Wild u akuzua për abuzim fizik dhe mendor kundër Lima në qershor 2022.

Pas fitores së tij nga Medvedev, Seyboth Wild iu përgjigj pyetjeve në lidhje me rastin duke thënë: “Unë nuk mendoj se është një temë për të cilën duhet të flasim pikërisht këtu. Mund të shkruani çfarë të doni”.

Ai më vonë lëshoi ​​një deklaratë për O Globo duke thënë: “Përballë disa artikujve dhe mesazheve të publikuara këtë javë për mua, do të doja të theksoja se procedurat në vazhdim në Brazil, si dhe një procedurë penale në të cilën unë paraqitem si viktimë, i nënshtrohen fshehtësisë. Kjo do të thotë se nuk mund të bëj deklarata, komente apo të ekspozoj biseda, të cilat duhet të vlejnë edhe për palën tjetër”.

“Por, mbi të gjitha dua të ritheksoj se nuk ka pasur gjykim dhe për këtë arsye nuk mund të konsiderohem fajtor. Nuk kam marrë ende fletëthirrjen nga Prokuroria Publike e Rio de Zhaneiros sepse nuk kam më vendbanim fiks në Brazil. Unë kam kaluar muajt e fundit duke u stërvitur në Argjentinë ose duke konkurruar në vende të tjera”.

“E njëjta gjë vlen edhe për palën tjetër (Lima tani jeton në SHBA). Avokatët e mi tashmë i kanë komunikuar gjykatave adresën e prindërve të mi në Parana (Brazil). Për momentin jam tërësisht i fokusuar në karrierën time. Jam kthyer në nivelin tim më të mirë dhe kam besim se pafajësia ime do të vërtetohet në kohën e duhur”, ka shtuar më tej ai. /Telegrafi/