“Unë mund ta shoh kualitetin”, Flick me fjalë të mëdha për ekipin e tij pas fitores ndaj Gironës

Barcelona e ka vazhduar formën spektakolare këtë sezon edhe të dielën, duke siguruar një fitore të madhe me rezultat 4-1 ndaj Gironës.

Ky rezultat e rikthen sërish epërsinë prej katër pikësh në La Liga, ndërsa kjo ishte fitorja e tyre e gjashtë në po aq ndeshje që prej se nisi sezoni i ri.

Ishte një paraqitje dominuese nga Barcelona dhe natyrisht, Hansi Flick ishte absolutisht i kënaqur me lojtarët e tij.

“Më pëlqen mënyra se si bëjmë presion. Ka qenë shumë intensive që nga minuta e parë. Ne e merituam fitoren dhe rezultatin. Është mirë të shohësh se si paraqitet skuadra, por siç e dini, unë punoj me ta çdo ditë dhe mund ta shoh kualitetin”.

Flick gjithashtu tregoi se sa i kënaqur ishte ai me mënyrën se si ekipi i tij ishte në gjendje që ta mbante formën që e shfaqi para pauzës me kombëtare.

“I thashë ekipit sa e rëndësishme ishte për ta që të vazhdonin në të njëjtën mënyrë si para pauzës me kombëtare dhe ata u përgjigjën për mrekulli”, përfundoi tekniku gjerman./Telegrafi/