Grupi i Automobile Joint Venture (Togg) i Turqisë, konsorciumi që zhvillon makinën e parë plotësisht elektrike të vendit, ka vendosur të jetë më shumë se thjesht një fabrikë makinash, por më tepër një kompani teknologjike.

Sipas mediave të huaja, përcjell Telegrafi, CEO i saj Gürcan Karakaş ka thënë se megjithëse është ende “herët për të dhënë informacion mbi këtë temë”, kompania po planifikon të vendosë një pajisje inteligjente në treg përpara se të lëshojë SUV-në e saj të segmentit C – që do të ishte versioni i parë i Togg në shitje.

Karakaş po fliste për zhvillimet më të fundit në objektet e Togg në Gemlik në provincën veriperëndimore të Bursës dhe procesin e prodhimit të makinës, të cilën ai e përshkroi gjithashtu si një “pajisje inteligjente”.

Duke shpjeguar se automjeti i parë i prodhuar në masë do të dalë nga grupi në tremujorin e fundit të këtij viti, pasi objektet e Gemlik të jenë gati për prodhim masiv, Karakaş tha: “Më pas, procesi i përmbushjes së kushteve teknike (homologimit) të nevojshëm për të hyrë në treg do të fillojë”.

Togg planifikon të prodhojë një total prej 1 milion automjetesh deri në vitin 2030, me prodhimin e pesë modeleve të ndryshme nga një platformë e vetme. /Telegrafi/