Tërmeti i së hënës, më i fuqishmi në Turqi që nga viti 1939 – ka pasur 100 pasgoditje deri më tani, thotë USGS

Kombet e Bashkuara thanë se tërmeti me magnitudë 7.8 që goditi Turqinë jugore herët të hënën ishte tërmeti më i fuqishëm i qarkut në më shumë se 80 vjet.

“Ky është tërmeti më i fuqishëm i regjistruar në Turqi që nga viti 1939”, ka thënë një raport i publikuar të hënën nga Zyra e OKB-së për Koordinimin e Çështjeve Humanitare (UNOCHA), përcjell Telegrafi.

UNOCHA tha se ekipet e reagimit emergjent nga Vlerësimi dhe Koordinimi i Katastrofave të Kombeve të Bashkuara (UNDAC), Grupi Ndërkombëtar Këshillimor i Kërkimit dhe Shpëtimit (INSARAG) dhe Ekipet Mjekësore Emergjente të Organizatës Botërore të Shëndetësisë (EMT) po mobilizohen në Turqi për të ndihmuar në përgjigjen humanitare.

“OKB-ja dhe partnerët po monitorojnë nga afër situatën në terren dhe po kërkojnë të mobilizojnë fondet emergjente në rajon”, thuhet në raport.

Ndërkohë thuhet se të paktën 100 pasgoditje me magnitudë 4.0 ose më shumë kanë ndodhur që nga tërmeti me magnitudë 7.8 që goditi Turqinë jugore të hënën në mëngjes me orën lokale, sipas Shërbimit Gjeologjik të Shteteve të Bashkuara.

Me kalimin e kohës nga tërmeti fillestar, frekuenca dhe magnituda e pasgoditjeve priren të ulen.

Megjithatë, ka ende gjasa të ndodhin pasgoditje 5.0 deri në 6.0 dhe të sjellin rrezik për dëmtime shtesë për strukturat që janë “dobësuar” nga tërmeti fillestar.

Kjo sjell një kërcënim të vazhdueshëm për ekipet e shpëtimit dhe të mbijetuarit. /Telegrafi/