Sportistët që do të marrin pjesë në Lojërat Mesdhetare “Prishtina 2030” do të akomodohen në konvikte

Qendra e Studentëve apo e njohur si ‘konviktet’ ka njoftuar se është përzgjedhur si vend për akomodimin e mijëra sportistëve që do të marrin pjesë në Lojërat Olimpike Mesdhetare “Prishtina 2030”.

Asambleja e Përgjithshme e Komitetit Ndërkombëtar të Lojërave Mesdhetare (ICMG) është mbajtur në Heraklion të Greqisë, ku Kosova ka fituar organizimin e Lojërat Mesdhetare të vitit 2030.

Pas fitimit të organizimit, tani kanë filluar edhe përgatitjet dhe Qendra e Studentëve ka njoftuar tashmë se sportistët që do të marrin pjesë në këtë Lojëra Mesdhetare do të akomodohen në konvikte.

Sportistët që do të akomodohen nëpër konvikte, përveç fjetjes, do të mund edhe të ushqehen në mensë, të ndihen të sigurt dhe të kenë të gjitha kushtet.

Postimi i qendrës së studentëve

Qendra e Studentëve do të akomodojë me mijëra sportistë në Lojërat Mesdhetare Prishtina 2030

Jemi të lumtur t’iu njoftojmë se në arritjen historike të Kosovës për organizimin e Lojërave Mesdhetare Prishtina 2030 edhe Qendra e Studentëve do të japë kontribut në mënyrë që shteti ynë të arrijë suksesshëm të përmbushë këtë përgjegjësi të madhe, duke u shndërruar në “Fshat Mesdhetar”.

Qendra jonë është përzgjedhur si vend për akomodimin e mijëra sportistëve që do të marrin pjesë në këtë organizim të përmasave ndërkombëtare.

Qendra e Studentëve, ka pasur një zhvillim të hovshëm vitet e fundit dhe është një strehë e sigurt e plot rehati.

Pastërti, qetësi, ushqim i shijshëm e i shëndetshëm do të ofrohet në Mensën tonë.

Qendra e Studentëve viteve të fundit është kthyer në një qendër moderne, që garanton akomodim me të gjitha kushtet dhe me staf shumë mikpritës.

Gjithnjë pjesë e ngjarjeve më të mëdha historike të Kosovës.

/Telegrafi/