Shefi i NATO-s deklaron se Gjermania do të rrisë shpenzimet e mbrojtjes

Gjermania duhet të shpenzojë më shumë për mbrojtjen, ka deklaruar Sekretari i Përgjithshëm i NATO-s, Mark Rutte.

“Të gjithë aleatët e NATO-s duhet të investojnë më shumë dhe unë besoj se Gjermania do të vazhdojë të rritet”, tha Rutte së bashku me kancelarin gjerman Olaf Scholz.

Bëhet e ditur se shpenzimet gjermane për mbrojtjen në vitin 2024 janë në rrugën e duhur për të arritur objektivin e NATO-s prej 2% të prodhimit të brendshëm bruto (GDP) për herë të parë në 30 vjet.

Kjo rritje e investimeve, e shpallur nga Scholz si një “pikë kthese”, vjen pas pushtimit rus të Ukrainës në vitin 2022 dhe do të bëjë që Gjermania të shpenzojë 100 miliardë euro gjatë disa viteve, shkruan yahoonews, përcjell Telegrafi.

Rutte vlerësoi fondin si “një ndryshim të madh” për sigurinë e NATO-s, por e shtyu qeverinë gjermane të shkojë më tej në investimet e mbrojtjes dhe mbështetjen e saj për Ukrainën.

“Si një ish-kryeministër, e di se nuk është gjithmonë e lehtë për qeveritë të ndajnë fonde për mbrojtjen kombëtare dhe për ndihmën për Ukrainën, por të dyja janë vendimtare për sigurinë tonë kolektive”, tha holandezi.

Ndryshe, shefi i NATO-s paralajmëroi gjithashtu se presidenti rus Vladimir Putin nuk do të ndalet nëse fiton në Ukrainë.

“Rusia po kryen një fushatë intensifikimi të sulmeve hibride në të gjithë NATO-n përmes dhunës, sabotimit dhe ndërhyrjes në demokracitë e aleancës”, tha Rutte.

“Kjo tregon se ndryshimi i frontit në këtë luftë nuk është më vetëm brenda Ukrainës”; shtoi ai, duke vënë në dukje aktivitetin rus në Evropën Perëndimore, në Baltik dhe Arktik. /Telegrafi/