Shala paralajmëron masa reciprociteti ndaj Maqedonisë së Veriut

Ministri i Tregtisë dhe Industrisë (MTI), Endrit Shala, ka thënë se i ka dërguar një letër ministrit të Ekonomisë të Maqedonisë së Veriut, Kreshnik Bekteshi, ku ka kërkuar që sa më shpejt të largohen barrierat të cilat i ka vendosur ky shtet ndaj produkteve kosovare.

Shala ka thënë se, është i shqetësuar lidhur me ndalimin e eksportit të rasadit të peshkut nga Kosova në drejtim të tregut të Maqedonisë së Veriut.

“Me lejoni të theksoj rëndësinë e të bërit tregti pa barriera në mes të dy vendeve tona dhe obligimet që të dyja vendet kanë ndërmarrë në kuadër të marrëveshjes së CEFTA-s. Këto shkelje nga Maqedonia e Veriut për angazhimet e saj në CEFTA përbëjnë një shqetësim të madh për Qeverinë time dhe ju ftoj që të gjeni një zgjidhje për këtë çështje sa më shpejtë të jetë e mundur. Jemi në pritje nga autoritetet e Maqedonisë së Veriut që do t’i heqin këto barriera tregtare në të kundërtën do të jemi të detyruar të reagojmë, ku si reagim do të jetë trajtimi i njëjtë i produkteve të Maqedonisë së Veriut që hyjnë në tregun e Republikës së Kosovës”, thuhet në letrën e Shalës dërguar ministrit Bekteshi.

Kujtojmë se përmes një vendimi që hyri në fuqi më 1 qershor të këtij viti, Maqedonia ka ndaluar importin e peshkut të gjallë që dedikohet për rritje ose mbushjen e hurdhave me peshq të vegjël me prejardhje nga Kosova.

Për më tepër është vendosur edhe një taksë prej afër 700 euro për çdo hyrje të kamionëve të peshkut në Maqedoninë e Veriut./Telegrafi.