PSG-ja shënon në sekondat e fundit për të marrë një pikë ndaj Le Havres

Paris Saint-Germaini ka luajtur baras me rezultat 3-3 në shtëpi ndaj Le Havres në kuadër të javës së 31-të në elitën e futbollit francez.

Pjesa e parë u karakterizua me një lojë sulmuese nga mysafirët, ku eventualisht ata arritën që të shënojnë dy herë.

Fillimisht ata gjetën golin me anë të Christopher Operi i cili realizoi për 1-0 në minutën e 19-të, duke mos i lënë asnjë mundësi Keylor Navasit.

PSG-ja reagoi shpejt duke barazuar rezultatin vetëm dhjetë minuta më vonë me anë të Bradley Barcolas (29’) i cili shënoi për t’i barazuar shifrat në 1-1 pas asistimit nga Warren Zaire-Emery.

Mysafirët nuk qëndruan duarkryq, dhe shënuan përsëri për të rikthyer avantazhin në të mirën e tyre, kësaj radhe përmes Andrew Ayew i cili u tregua i saktë për rezultatin 2-1.

HALF-TIME: Paris Saint-Germain 1-2 Le Havre.#PSGHAC | #Ligue1 pic.twitter.com/kkvuN9flJU

— Paris Saint-Germain (@PSG_English) April 27, 2024

Në pjesën e dytë u shënuan edhe tre gola të tjerë, duke bërë që ndeshja të përfundonte me rezultat të barabartë 3-3.

Abdoulaye Toure (61’) shënoi për 3-1 nga pika e bardhë e penalltisë, ndërsa për të ngushtuar rezultatin u përkujdes Achraf Hakimi (78’) që shënoi për 2-3.

Teksa dukej që PSG-ja do të pësonte humbje në këtë ndeshje, në skenë u shfaq Goncalo Ramos (95′) i cili shënoi për të barazuar shifrat në 3-3 pas asistimit fantastik nga Kang-In Lee.

Me këtë barazim PSG-ja e lëshoi nga duart mundësinë për tu shpallur zyrtarisht kampion i Ligue 1, ndërsa këtë synon ta bëjë javën e ardhshme ndaj Toulouse./Telegrafi/