Prishtina do t’i nisë përgatitjet për edicionin e ri të hënën e 15 korrikut.

Skuadra bardhekaltër ishte pjesëmarrëse në Ligën e Evropës, por u eliminua në turin parakualifikues.

Faqja zyrtare e klubit ka njoftuar se të hënën në stërvitjen e parë do të paraqiten edhe tre futbollistë në prova.

Në anën tjetër FC Prishtina ka njoftuar se do të prezantohet edhe futbollisti i saj i ri Art Maloku që vije nga Vëllaznimi.

“Prishtina nesër nis fazën përgatitore për edicionin e ri të kampionatit 2019/20. Skuadra nuk do të jetë tërësisht e kompletuar deri të martën apo të mërkurën kur disa nga futbollistët kthehen nga pushimi jashtë vendit”.

“Në prova do të vijnë edhe tre futbollistë, do të sprovohet një brazilian, një jugkorean dhe një shqiptar nga Kroacia, ish-anëtari i kategorive të reja të Osijekut në Kroaci, mbrojtës i majtë, Adem Jahaj”.

“Ndërsa si futbollist i ri i skuadrës do të prezantohet ish-futbollisti i deritanishëm i Vëllaznimit, anëtari i grupmoshave të reja të Përfaqësueses së Kosovës, futbollisti 18 vjeç i disa pozitave mbrojtëse, Arti Maloku”, thuhet në faqen zyrtare të klubit. /Telegrafi/