Plagosja në veri, policia përgënjeshtron mediat serbe: Ne nuk qëlluam asnjë person

Një person është plagosur mbrëmë me armë zjarri në veri të Mitrovicës.

Policia përmes një njoftimi për media ka bërë të ditur se rasti ka ndodhur rreth orës 23:48, dhe se është duke i hetuar rrethanat e plagosjes, derisa shtoi se i plagosuri aktualisht ndodhet në spital duke marrë trajtim mjekësor.

E për këtë incident mediat serbe raportuan duke thënë se viktima u plagos nga Njësia Speciale e Policisë së Kosovës.

“Anëtarët e Rosu plagosën një serb pranë urës së Bistricës”, “Anëtarët e Rosu-së në urën e Bistricës kanë qëlluar në një veturë në të cilën ishte një serb, është goditur në gjoks”, “Rosu qëllon me armë serbin në rrugën Leposaviq-Zveçan”, janë këta disa nga titujt progandues të mediave serbe lidhur me rastin që ndodhi mbrëmë në veri.

Lexo po ashtu Plagoset me armë zjarri një person në veri, policia thotë se nuk dihen motivet

Këto pretendime të tyre, Policia e Kosovës i ka përgënjeshtruar, duke thënë se ata nuk kanë qenë të përfshirë në asnjë rast të gjuajtës me armë zjarri.

“Vlen të potencojmë dhe njëherit të sqarojmë se, Policia e Kosovës nuk është përfshirë në asnjë rast të shkëmbimit apo të gjuajtjes me armë zjarri ndaj asnjë grupi apo personi të caktuar.
Andaj edhe shkrimet, apo pyetjet e adresuara Policisë së Kosovës nga disa mediume serbe, se kinse Policia e Kosovës është përfshirë, apo në formën e pyetjes se a është përfshirë në gjuajtje me armë dhe plagosje të një personi te ura e Bistricë në komunë të Leposaviqit, ju informojmë dhe njëherit ritheksojmë se Policia e Kosovës, nuk është përfshirë në asnjë rast të shkëmbimit apo gjuajtjes me armë zjarri, në asnjë lokacion në veri të Kosovës, përfshirë edhe lokacionin e apostrofuar”, thuhet në njoftim.

Policia e Kosovës, ka theksuar se është duke kryer hetime intensive, me qëllim të zbardhjes sa më parë të këtij rasti.

Kujtojmë se kjo nuk është hera e parë që Policia e Kosovës ka hedhur poshtë raportimet e mediave serbe, e kryesisht për incidente të tilla që kanë ndodhur në veri edhe më parë. /Telegrafi/