LAJMI I FUNDIT:

Pato flet për dashurinë ndaj Milanit, momentet e mira dhe cilësitë e Leaos

Pato flet për dashurinë ndaj Milanit, momentet e mira dhe cilësitë e Leaos

I preferuari i tifozëve të Milanit, Alexandre Pato foli për kohën e tij me Milanin, mendimet e tij për skuadrën aktuale dhe sa shumë dashuri mban për klubin.

Sulmuesi brazilian kaloi gjashtë vjet të karrierës së tij me kuqezinjtë nga 2007 deri në 2013, fillimisht duke u depërtuar si një nga talentet më emocionues në Evropë përpara se dëmtimet përfundimisht ta prishnin kohën e tij në Lombardi.

Ndërsa Pato nuk i ka arritur kurrë më majat e fazave të hershme të karrierës së tij, ai ende mbahet mend me dashuri nga tifozët e Milanit.

Duke folur në kanalin Twitch të Milanit, Pato fillimisht diskutoi se cili ishte momenti më i mirë i karrierës së tij.

“Tifozët më pyesin se cilat janë momentet më të mira të karrierës sime, tani kam 17 vite që luaj. Momenti më i mirë ishte goli im i parë me Milanin kundër Napolit”, ka thënë fillimisht Pato.

Ai foli për ndeshjen e radhës të kuqezinjve kundër Monzas së Silvio Berlusconit.

“Është një moment i veçantë, që Monza të ketë pronarë si Berlusconi dhe Galliani. Do të jetë ndryshe. Pastaj në fushë do të ketë një motivim krejtësisht ndryshe. Nuk e dimë se çfarë do të thonë Berlusconi dhe Galliani në dhomën e zhveshjes!”.

Sulmuesi brazilian dha mendimet e tij për rritjen e Milanit gjatë viteve të fundit.

“Futbolli ka ndryshuar shumë, tani është shumë më i shpejtë. Milani ka hyrë në botën e sotme, Milani e ka kuptuar se si është futbolli modern. Unë pata fatin të luaja dhe të fitoja në Milano, që ishte ndryshe nga sot. Besoj se ata do të shkojnë në gjëra të mëdha”.

Pato tregoi edhe se kur planifikon të vizitojë herën tjetër stadiumin San Siro.

“Më ftuan në Itali, por nuk e di nëse do të vij. Unë jam në Brazil duke trajtuar gjurin tim. Por mezi pres të vij në San Siro. Le të shohim se çfarë ndodh”.

Braziliani komentoi se cili lojtar aktual i Milanit është më i ngjashëm me të.

“Gjithmonë kam folur për Leaon, më ka pëlqyer gjithmonë. Ai kishte vështirësi në fillim, por e kuptoi se çfarë do të thotë të jesh te Milani, tani po bën gjëra të mëdha”.

“Unë kam thënë gjithmonë se Leao është dikush që e ka kuptuar futbollin italian dhe çfarë është Milani, ai po bën gjëra të mëdha. Shpresoj që ai të vazhdojë kështu, është një përgjegjësi shumë e rëndësishme”.

Së fundi, Pato diskutoi për dashurinë që ai mban ende për tifozët e Milanit.

“Tifozët e Milanit janë ndryshe. Më mungojnë ata. Të gjitha zemrat që bëra duke festuar golat ishin për tifozët e Milanit. Milani do të jetë gjithmonë në zemrën time, faleminderit për gjithçka që bëri për mua”, përfundoi braziliani. /Telegrafi/