Izraeli ka hedhur poshtë planin e fundit të SHBA-së për të ecur drejt fazës tjetër të paqes në Gaza, duke kërkuar çarmatimin e plotë të Hamasit përpara se të tërhiqen forcat izraelite.
“Izraeli e hedh poshtë dokumentin me 15 pika”, tha kryeministri Benjamin Netanyahu në fillim të një mbledhjeje të kabinetit.
Ai deklaroi se ushtria izraelite "nuk do të tërhiqet fare derisa Hamasi të çarmatoset vërtet dhe do të vazhdojë të pengojë kërcënimet kundër forcave dhe qytetarëve”.
“Dhe kur them çarmatosni Hamasin, kjo do të thotë armë të rënda, armë më pak të rënda, të gjitha armët. Dhe ne po flasim për çarmatim të vërtetë, jo për një çarmatim fiktiv”, tha Netanyahu.
"Po e diskutojmë tani këtë me amerikanët. Ata kanë ide, disa prej të cilave janë të pranueshme për ne dhe disa jo, dhe ne dimë si t'i kundërshtojmë këto gjëra", shtoi ai.
“Për sa kohë që unë jam kryeministër, nuk do të krijohet asnjë shtet palestinez — as në Gaza dhe as në Bregun Perëndimor”, vazhdoi Netanyahu.
Ndryshe, në fund të korrikut, presidenti i SHBA-së Donald Trump njoftoi atë që e përshkroi si një marrëveshje historike për të siguruar çarmatimin e Hamasit dhe të gjitha grupeve të tjera të armatosura në Gaza, disa muaj pasi presidenti njoftoi për herë të parë një marrëveshje armëpushimi të ndërmjetësuar nga SHBA-ja midis Hamasit dhe Izraelit.
Hamasi tha se do ta miratonte marrëveshjen vetëm nëse Izraeli ndalon sulmet në Gaza dhe tërheq trupat përsëri në "vijën e verdhë", siç përcaktohet nga marrëveshja e armëpushimit të tetorit.
Forcat izraelite aktualisht kanë të pushtuar më shumë se gjysmën e Gazës, në lindje dhe në jug të territorit.
