Pasuria e Pacquiaos pas përfitimeve nga meçi ndaj Broner kalon shifrën prej 180 milionë eurove

Manny Pacquiao i është kthyer boksit me një triumf ndaj Adrien Broner në meçin e zhvilluar fundjavën që shkoi në Las Vegas.

Filipinasi triumfoi në MGM Grand Garden Arena përpara 13.025 të pranishmëve dhe miliona të tjerëve që e shikuan përmes ekranit, ndërsa menjëherë pas fitores kërkoi një rimeç me Floyd Mayweather.

Pasuria e Manny Pacquiao

Pas fitores ndaj Broner, rekordi i tij i boksit është 61-7-2 (nga 70 duele të zhvilluara), ndërsa besohet se përfitimet totale nga meçet në të cilat ka marrë pjesë, sidomos në ato me paketat ‘paguaj për të shikuar’, është 1.2 miliard dollarë (1.06 miliard euro).

Në vitin 2015, Forbes e ka renditur ‘Pac Man’ si sportistin e dytë më të paguar në botë, vetëm prapa pikërisht Mayweatherit.

Ndërsa pasuria e tij neto në vitin 2018, sipas The Richest, është llogaritur 148 milionë funte (169 milionë euro).

Pacquiao fitoi 15.5 milionë funte (17.7 milionë euro) për duelin e tij ndaj Timothy Bradley në maj të vitit 2016. Sipas Forbes, Besohet se një shumë të tillë do ta marrë dhe për triumfin e tij ndaj Broner. Kështu që pasuria e 40-vjeçarit pritet të kalojë shifrën prej 180 milionë eurosh.

Përfitimet më të mëdha të Broner për një meç deri më tani kanë qenë një milion dollarë (880.000 euro), ndërsa nga ky duel pritet të fitojë disa miliona.

A do të ndodhë rimeçi me Floyd Mayweather?

Mayweather nuk ka bërë asnjë reagim kur Manny i kërkoi rimeç pas fitores ndaj Broner, mirëpo shefi ekzekutiv i Mayweather Promotions ka thënë se nuk ka gjasa që amerikani të hyjë sërish në ring me filipinasin.

“Ai nuk ka motivim as dëshirë. Po bën jetën më të mirë, po udhëton, udhëheq shumë biznese, po shpenzon nga paratë që i ka fituar me shumë mund. Në shkurt do t’i mbushë 42 vjet. Kur është mjaft është mjaft. Çfarë të duhen paratë kur nuk mund t’i shpenzosh?”, ka thënë mes tjerash Leonard Ellerbe. /Telegrafi/