Nuk na dhanë asnjë pikë në “Eurovision”, por këngëtarët nga Rumania ‘çmenden’ pas këngës “Suus” (Video)

Shqipëria suksesin më të madh të arrirë në “Eurovision” vazhdon ta ketë me këngën “Suus”.

Këtë këngë, këngëtarja nga Kosova, e kishte interpretuar në vitin 2012, nga ku edhe kishte arritur të renditet e pesta në natën finale.

Duke qenë një këngë e vështirë për tu kënduar dhe që kërkon shtrirje të madhe vokale, duket se “Suus” mbetet ndër të preferuarat për të shfaqur talentin në një talent-show.

Kështu së paku bëjnë me dije ‘coverat’ që gjenden në YouTube, në të cilat shfaqen artistë të rinj nga vende të ndryshme që e këndojnë vazhdimisht këtë këngë në kompeticione.

Po të shikosh me vëmendje, kjo këngë është ndër më të preferuarat e talent show-ve në Rumani.

Një vajzë nga Rumania e quajtur Jasmine, arriti të rrëmbejë duartrokitje më të zjarrta nga publiku pasi këndoi këngën “Suus” në një festival të njohur për fëmijë në Navodari.

Alexe Eduard-Alexandru është një tjetër djalë nga Rumania që ka marrë pjesë në spektaklin “Vocea Prahovei 2017”, ku kishte kënduar të njëjtën këngë. Kjo performancë u pëlqye shumë, pasi të rralla janë rastet kur kënga “Suus” erdhi në një version mashkullor.

Ndërkohë Jessica Lazarescu në spektaklin “The Voice of Romania” këndoi gjithashtu këngën e Ronës, dhe e çuditshmja është se pavarësisht gjuhës, ajo ka arritur ta këndojë tekstin në mënyrë perfekte dhe të qartë. Kjo performancë është shikuar rreth 300 mijë herë në kanalin YouTube.

Afina Madoian e solli këngën shqipe në vitin 2014-të para publikut rumun në një kompeticion të njohur atje, dhe ishte pritur gjithashtu me duartrokitje të zjarrta nga publiku.

Kujtojmë që në “Eurovision 2012”, Rumania nuk i kishte dhënë as edhe një pikë Ronës për performancën e saj, por pavarësisht kësaj ata nuk kanë mundur t’ia humbasin vlerat e pamohueshme që ka kënga “Suus”. /Telegrafi/