Newcastle United ka arritur të shkaktojë befasi duke mposhtur Arsenalin me rezultat të pastër 2-0.

Topçinjtë e kishin me patjetër fitoren, për të mbajtur pozitën e katërt në kampionat, por një gjëje të tillë nuk ia arritën.

Pjesa e parë përfundoi ashtu siç filloi me rezultat të barabartë 0-0, përkundër disa rasteve të mira që kishin dy skuadrat.

Goli i parë në ndeshje erdhi 10 minuta pas fillimit të pjesës së dytë, kur Ben White devijoi një top i cili përfundoi në rrjetë për t’i dhënë epërsinë 1-0 vendasve.

Arsenali me të gjitha forcat u hodh në sulm për të barazuar rezultatin, duke rrezikuar portën e vendasve, por pa sukses.

Pesë minuta para fundit të ndeshjes, ishte mesfushori Bruno Guimaraes që realizoi golin për rezultatin përfundimtar 2-0.

Me këtë humbje Arsenalit i zbehen edhe më shumë gjasat për një vend në Ligën e Kampionëve, pasi mbetet në vendin e pestë me 66 pikë, dy më pak se Spurs që ndodhen në vendin e katërt.

Ndeshjen e radhës Arsenali e zhvillon në Emirates Stadium përballë Evertonit, derisa Newcastle United luan në udhëtim te Burnley. /Telegrafi/