Në mbledhjen e së mërkurës, Qeveria ka ndarë edhe 35 milionë euro buxhet, të cilat do të mundësojnë pagesën e mbështetjes së njëhershme për të punësuarit e sektorit privat dhe për studentët.

Ministri i Financave, Hekuran Murati, ka bërë të ditur se komisioni deri më tani ka validuar shumicën e përfituesve që plotësojnë kriteret.

Reklama

Ai tha se ekzekutimi i 100 eurove për punëtorët e sektorit privat pritet të bëhet këtë javë.

“Tani kanë mbetur të përfundohen vetëm procedurat e nevojshme për ekzekutimin e pagesave, dhe përfituesit që janë validuar do t’i pranojnë paratë në llogaritë e tyre këtë javë”, u shpreh Murati.

Reklama

Ndërkaq, 800 mijë qytetarë të Kosovës do të përfitojnë nga këto shtesa të ndara nga Pakoja e Ringjalljes Ekonomike.

Reklama

Murati theksoi se për studentët aplikimi është ende i hapur, dhe sipas tij, sapo të përmbyllet ky hap do të procedohet pagesa edhe për ta.

Për punëtorët që kanë pagë më të lartë se 1,000 euro dhe punëtorët që nuk kanë qenë të regjistruar në muajin shkurt, sipas Qeverisë nuk mund të përfitojnë këto subvencione nga shteti. /Telegrafi/