“Mund të luaja përballë Lavezzit e Cavanit” – Gjeraj tregon si refuzoi ofertën e klubit shqiptar për mos ta lënë nënën vetëm

Ish-futbollisti i njohur tanimë trajner me profesion, Robert Gjeraj, ka qenë mysafiri i radhës në podcastin “Arena e Yjeve” që është prodhim i Telegrafit.

Ai ka rrëfyer se si kishte refuzuar ofertën e klubit të njohur shqiptar Vllaznisë, vetëm për të mos e lënë nënë vetëm në shtëpi.

“Në 2008 kur e morëm kupën me Vëllaznimin, unë kam qenë me pa, nuk e di kush ka qenë me pa. Edhe Ilir Nallbani luante në Vllazni të Shkodrës”.

“Më kanë para ata duke luajtur, iu kam pëlqy. Në atë kohë Elvin Beqiri më duket e ka lënë futbollin, unë luaja mbrojtës i djathtë”.

“Mua në prill më vdiq babai, në qershor ka qenë finalja e Kupës nuk i kishte as dy muaj. Ende nuk ishte ambientuar me humbjen e babait dhe nëna nuk ishte mirë, por hajt thash ta provojë te shoh”.

“Mbas 2-3 ditëve i tregova nënës sime po e pashë që ajo po mërzitet. U bën tri ditë dhe thashë unë po du me u kthy, nuk kam mundësi unë ta lë nënën vet”.

“Në atë kohë Vllaznia luante në Europa League me Napolin. Ma bënin ata ke me lujtë me Cavanin, Lavezzin. Ëndërr e kisha, por ta lë nënë vet për futboll, edhe një herë të rikthehesha në kohë do ta merrja të njëjtin vendim”, ka thënë Gjeraj.

Këtë podcast mund ta ndiqni në TV Dukagjini çdo të shtune nga ora 17:10, ndërsa nuk do të ishte i mundur pa përkrahjen e sponsorëve tanë  Patos  ,  KGM Kosova dhe Golden Eagle Energy Drink. /Telegrafi/