Ministri izraelit: Izraeli e Kosova ndajnë të njëjtat vlera, presim të thellojmë bashkëpunimin

Ministri për Bashkëpunim Regjional të Izraelit, Esawi Frej pas takimit me ministrin e Administrimit të Pushtetit Lokal, Elbert Krasniqi, ka thënë se është nder për të që të jetë sot për vizitë në Kosovë, duke e quajtur këtë si moment historik.

Ai ka thënë se vjen për vizitë në Kosovë një vit pas vendosjes së marrëdhënieve si dy shtete.

“Vij këtu në emër të shtetit të Izraelit që t’ju them juve dhe popullit të Kosovës se krahët tonë janë të hapur. Ne duam të avancojmë marrëdhënien e veçantë dhe ta fuqizojmë e thellojmë atë”, u shpreh ministri Frej.

Ai theksoi se Izraeli dhe Kosova kanë shumë gjëra të përbashkëta.

“Ne kemi shumë gjëra të përbashkëta, jemi nga e njëjta fqinjësi ndajmë të njëjtat vlera dhe e duam demokracinë. Ne e promovojmë bashkekzistencës për shoqëritë tona të përbashkëta dhe tolerancën”, u tha Frej.

Ministri izraelit theksoi se e “ne e kuptojmë çmimin e konfliktit dhe luftën për pavarësi, jemi vende të vogla që të dyja me kapital dhe resurse të pasura”

“Jam në vizitën time të parë këtu në Kosovë, dhe ky është vetëm fillimi dhe shpresoj që ky fillim do të na sjellë neve të jemi më të bashkuar dhe më të fuqishëm me njëri-tjetrin”, tha Frej.

Ai foli edhe për investimet e mundshme të Izraelit në Kosovë, duke thënë se fillimisht për të ndërtuar diçka u nevojitet një proces.

“Çdo gjë që të ndërtojmë na nevojitet një proces, është vizita e parë e ministrit izraelit në Kosovë. Ne duhet të gjejmë mundësitë në cilën fushë  do të investojmë shembull në bujqësi, siguri apo fusha tjera. Pastaj populli i izraelit dhe qeveria e izraelit do të bëjë investimet e para në Kosovë, por së pari na nevojitet që të njohim njëri-tjetrin”, tha ministri Frej. /Telegrafi/